Umunya-Côte d’Ivoire, Didier Drogba, wakiniye amakipe atandukanye ku Isi cyane cyane ku mugabane w’u Burayi ndetse n’ikipe y’igihugu cye, yatangaje ko asezeye mu kibuga.
Drogba w’imyaka 40, yatangaje ko yasezeye mu kibuga kuri uyu wa Kane tariki ya 22 Ugushyingo 2018, nyuma y’imyaka 20 yari akimazemo.
Abicishije ku rukuta rwe rwa Twitter, yashimiye abamubaye hafi bose muri uru rugendo rw’imyaka 20. Ati “Ndashaka gushimira abakinnyi, amakipe, abatoza n’abafana twakoranye igihe nari ntangiye urugendo ndi umwana.
Ndashaka gushimira umuryango wanjye n’abantu bagiye bamfasha mu makipe nari ndimo muri uru ruhando rwa ruhago”.
Drogba yakiniye amakipe yo mu bihugu bitandatu atwara ibikombe 18, yatwaye ibihembo bibiri by’umukinnyi mwiza w’umwaka w’umunyafurika bitangwa na BBC.
Yafashije Côte d’Ivoire kwitabira bwa mbere igikombe cy’Isi anayitsindira ibitego 65 mu mikino mpuzamahanga.
Drogba afatwa nk’itwari mu ikipe ya Chelsea, kuko mu myaka Umunani yayimazemo, yatsinze ibitego 157 mu mikino 347. Icyo yatsinze mu 2012 cyahesheje iyi kipe igihombe kiruta ibindi ku mugabane w’u Burayi ‘UEFA Champions League’.
Muri Shampiyona y’Abongereza, Drogba yakiniye Chelsea imikino 254 atsinda ibitego 104, atanga imipira yavuyemo ibitego 54.
Mu mwaka wa 2011, Didier Drogba yashakanye na Diakité Lalla, bafitanye abana batatu; Iman Drogba, Isaac Drogba, Kieran Drogba.
