Ku mugoroba wo kuri uyu wa mbere tariki ya 10 Kamena 2024 nibwo hatangakwe ko ikipe ya APR FC ndetse na Rayon Sports bazakina umukino wa gishuti kuri uyu wa Gatandatu ukazabera kuri Sitade Amahoro.
Ni umukino wateguwe mu rwego rwo gusogongera iyi Sitade imaze igihe ivugururwa ikava ku kwakira abantu ibihumbi 25 000 ikagezwa ku kwakira ibihumbi 45000 bicaye neza.
Nk’uko byemejwe n’umuvugizi wa Guverinoma y’u Rwanda wungirije, Alain Mukurarinda yemeje iby’uyu mukino ko uzakinwa mu rwego rwo gusogongera iki kibuga na sitade nyirizina.
Abinyujije ku rubuga rwa X rwitwa Twitter, Mukurarinda yagize ati “ Nk’uko byahoze mu muco wacu, ku ya 15/6/2024 ni “Umuhuro mu Mahoro” maze ku ya 4/7/2024 tuzabutahe dusharamye”.
Uyu mukino uzahuza APR FC na Rayon Sports uzakinwa guhera ku isaha ya Saa Kumi n’imwe zuzuye, kwinjira kuri uyu mukino kandi birasaba ko hazaba haguzwe itike y’amafaranga igihumbi ndetse n’ibihumbi 10 mu myanya y’icyubahiro.
Mu rwego rwo Kwitegura uyu mukino uzakinwa kuwa Gatandatu, aya makipe yombi aritegura gutangira imyiteguro guhera kuri uyu wa Gatatu.
Ni mugihe byari biteganyijwe ko ikipe ya APR FC izasubukura imyitozo tariki ya 17 Kamena 2024 naho Rayon Sports yo yagombaga gusubukura tariki ya 1 Nyakanga 2024.
