Kuri uyu wa mbere tariki ya 14 Kamena 2021 nibwo habaye tombola y’uko amakipe agomba guhura mu mikino ya nyuma y’igikombe cy’isi mu mukino w’intoki wa volleyball ku bakobwa batarengeje imyaka 20.
Iyi tombola ikaba yagaragaje ko ikipe y’igihugu y’u Rwanda y’abakobwa bari mu itsinda rya mbere hamwe n’ikipe y’igihugu ya Brazil, u Buholandi ndetse n’ikipe y’iguhugu ya Repubulika ya Dominican.
Ku rundi ruhade ikipe y’u Bubiligi, Serbia, Argentine n’ibirwa bya Cuba bari mu itsinda ya kabiri.
Itsinda rya Gatatu ryo rigizwe na Turukiya, Pologne, Leta Zunze Ubumwe za Amerika na Thailand ni mu gihe irya Kane ririmo u Butaliyani, u Burusiya, Misiri ndetse na Bélarus.
U Rwanda ruzahaguruka i Kigali ku itariki ya 30 Kamena 2021 berekeza mu Buholandi ahazabera iryo rushanwa, iyi kipe kandi ikaba izabanza no gukina imikino ya gicuti mbere y’uko irushanwa rizatangira nyirizina.
Muri iki gikombe cy’isi u Rwanda rukaba ruzaserukana n’abari bo mu gihugu cya Misiri nk’ibuhugu bihagarariye umugabane wa Afurika.
Biteganyijwe ko iyi mikino y’igikombe cy’isi cy’abatarengeje imyaka 20 mu bamobwa izatangira tariki ya 09 kugeza kuya 18 Nyakanga 2021.
