Ku mugoroba wo kuri uyu wa mbere tariki ya 5 Ukuboza 2022 nibwo ubuyobozi bw’ikipe ya Kiyovu SC bwatangaje ko bwahindurite inshingano uwari umutoza mukuru wayo André Landeut wagizwe “Manager Sportif” muri iyi kipe y’urucaca.
Nyuma yo gutangaza ko uyu mutoza ahunduriwe inshingano, ubuyobozi bwa Kiyovu Sport Club bwitegura gushaka uko bazana undi mutoza kuko ngo ibiganiro byo byamaze gutangira ku musimbura kuri uwo mwanya.
Binyuze ku rubuga rwa Twitter rwa Kiyovu bagize bati ” Tunejejwe no kumenyesha abakunzi ba Kiyovu Sports ko turi kwitegura kwakira umutoza mushya, mu gihe Alain-André Landeut yasubiye mu nshingano ze arizo kuba manager Sportif wa Kiyovu Sports.”
“Abatoza bari bungirije nibo bari bube bafite ikipe mugihe turi mubiganiro n’umutoza mushya.”
Uyu mutoza André Landeut ahunduriwe umwanya nyuma yaho yari aherutse kwirukanwa n’umuyobozi wa Kiyovu, Mvukiyehe Juvénal amushinja gutuma habamo ubwumvikane buke hagati y’uwo mutoza ndetse n’abakinnyi barimo Elissa Ssekisambu.
Kiyovu SC yitegura kuzana umutoza mushya, kugeza ubu nyuma y’umunsi wa 12 wa shampiyona y’u Rwanda, iyi kipe iri kumwanya wa 3 aho ifite amanota 21 gusa.
