Umunyarwenya akaba n’umukinnyi wa Filime ukomeye mu Rwanda, Mugisha Emmanuel uzwi nka Clapton Kibonge yatangiye gusohora filime yanditse mu minsi ishize ubwo Abanyarwanda muri rusange bari muri gahunda ya Gumamurugo.
Mu kiganiro RUSHYASHYA News yagiranye na Mugisha kuri uyu wa Kane tariki ya 11 Werurwe 2021, Mugisha Emmanuel Clapton wamenyekanye nka Kibonke yakuyeho urujijo ku bibazaga niba yaravuye muri Comedy agaharira umwanya filime, cyane ko muri iyi minsi ahugiye muri Filime “Umuturanyi” igezweho ica kuri youtube ye.
Yagize ati “Comedy igira ubwoko bwinshi butandukanye, Comedy ntabwo nayiretse, na filime nkora iri mu bwoko bwa comedy kuko irasekeje buri muntu wese uyikinamo arasetsa uretse abantu bake, hanyuma ikindi icyahagaze ni stand-up comedy, kuko ibitaramo by’imbonankubone bitemewe kubera icyorezo cya Covid-19, ariko ubundi bwoko bwa Comedy ndabukora. ”
Muri iyi minsi Clapton Kibonke ahugiye cyane muri Filime” Umuturanyi ” ica ku rubuga rwe YouTube, ni umunyarwenya kandi wanafashije abasore bagize itsinda rya “Bigomba Guhinduka” ndetse ari no gufasha abandi banyarwenya n’abakinnyi ba filime batandukanye.