Kuri uyu wa Gatandatu tariki ya 04 Ukwakira 2025, nibwo ubuyobozi bw’Ikipe ya Police Women Volleyball Club bwatangaje ku mugaragaro ko yasinyishije Dusabe Flavia wakiniraga APR WVC.
Uyu mukinnyi wo hagati (Middle Blocker) mu ikipe y’Igihugu aje muri Police WVC nyuma y’imyaka umunani yari amaze mu ikipe yambara umweru n’umukara ya APR.
Dusabe Flavia abaye umukinnyi wa mbere ukomeye Police WVC isinyishije muri uyu mwaka w’imikino, aho azafatanya mu bakina hagati na Sandra Ayepoe ndetse na Mutoni Angel.
Mu rwego rwo kumwakira, Police WVC yanyujije ubutumwa kuri konti zabo za Social Media bugira buti:
“Ubu ni umwe muri twe… tuguhaye ikaze mu ikipe.”
Dusabe Flavia agiye mu ikipe ya Police aho we kimwe n’andi makipe bitegura gutangira umwaka w’imikino wa 2025-2026, uteganyijwe gutangira tariki ya 17 Ukwakira 2025.
Gusa iyi shampiyona izabanzirizwa n’irindi rushanwa ryateguwe mu rwgeo rwo kwitegura neza uyu mwaka, ni irushanwa rizakinwa kuya 10 kugeza kuya 12 Ukwakira 2025 rikabera muri Petit Stade.
