Kuri uyu wa Gatatu, tariki 1 Ukwakira 2025, hasozwaga imikino ya 1/2 cya Rwanda Cup mu bagabo yabereye muri Petit Stade.
Mu mukino wa mbere, Tigers BBC yatsinze APR BBC ku manota 76-74, ukaba wari umukino wari urimo guhatana gukomeye kugeza ku munota wa nyuma.
Nyuma yaho, ikipe REG BBC yatsinze Kepler BBC ku manota 75-58, ikomeza kwerekana ubukombe bwayo mu irushanwa.
Ibi byatumye Tigers BBC na REG BBC zibona itike yo gukina umukino wa nyuma, uteganyijwe ku wa Gatanu, tariki ya 3 Ukwakira 2025.
Ku rundi ruhande, APR BBC na Kepler BBC zizahatana ku mukino wo guhatanira umwanya wa gatatu.
Imikino yombi izabera muri Petit Stade, aho umukino wo guhatanira umwanya wa 3 uzatangira saa kumi n’ebyiri z’umugoroba (18:00), naho umukino wa nyuma ukaba saa mbiri n’igice z’ijoro (20:30).
Ni ku nshuro ya kabiri Rwanda Cup ikinwa mu byiciro byombi (abagabo n’abagore), aho ku nshuro ya mbere yabaye mu 2024, APR BBC yegukanye igikombe itsinze REG BBC ku manota 110-92 mu mukino wa nyuma wabaye ku wa 9 Kanama 2024.
