Ikipe y’Igihugu y’u Rwanda y’Abagore ya Volleyball yahagurutse kuri iki Cyumweru mu gitondo i Kigali, yerekeza i Nairobi muri Kenya, aho igiye kwitabira CAVB Women’s Nations Championship 2026, imikino y’Igikombe cya Afurika iteganyijwe kubera i muri icyo gihugu kuva ku wa 25 Kanama kugeza ku wa 5 Nzeri 2026.
Ku mugoroba wo ku wa Gatandatu, Minisitiri wa Siporo, Madamu Nelly Mukazayire yafashe umwanya wo gusezerera no guherekeza ikipe y’Igihugu, ayifuriza amahirwe masa muri iri rushanwa, anabasaba kuzahagararira u Rwanda neza no kuzamura ibendera ry’igihugu.
Ikipe y’igihugu yahagurutse ku Kibuga Mpuzamahanga cy’Indege cya Kigali i Kanombe saa Tatu n’igice aho ihita itangira kwitegura ii rushanwa rizabera Kasarani Indoor Arena na Uliznzi Sport Complex Indoor Arena, ibibuga biherere mu mujyi mukuru wa Kenya, Nairobi.
Iri rushanwa rizitabirwa n’ibihugu 16, aho uko amatsinda azaba ateye n’uko amakipe azahura bizamenyekana ku wa Mbere, tariki ya 24 Kanama 2026.
U Rwanda ruheruka kwitabira Igikombe cya Afurika mu 2023, aho rwageze ku mwanya wa kane, nyuma ya Misiri, Kenya na Cameroon.
Ikipe y’u Rwanda igiye muri Kenya ifite intego yo kongera kwitwara neza no guhatanira umwanya mwiza muri iri rushanwa rihuza ibihugu bikomeye muri Volleyball ku mugabane wa Afurika.
Umutoza mukuru w’ikipe y’igihugu, Frédéric Guérin, yajyanye abakinnyi 14, barimo:
- Ndagijimana Iris
- Mpuhwezimana Diane
- Musaniwabo Hope
- Musabyemariya Donatha
- Umutoni Anitha
- Dusabe Flavia
- Munezero Valentine
- Nzamukosha Olive
- Mukandayisenga Benitha
- Tuyishimire Aloysia
- Yankurije Francoise
- Nyirahabimana Divine
- Uzamukunda Filette
- Uwimbabazi Lea
