“Joseph Kabila yabaye perezida, Kabila ni perezida, Kabila azahora ari perezida”, ibi ni ibyatangajwe n’Umunyamabanga Uhoraho w’ishyaka PPRD riri ku butegetsi muri Repubulika iharanira Demokarasi ya Congo, Emmanuel Ramazani Shadary ubwo yari I Mbandaka mu bukangurambaga bwa mbere muri Equateur bugamije gushishikariza abayoboke kuzitabira amatora.
Bwana Emmanuel Ramazani akaba yarasubizaga abandikaga kuri twitter ko ibya perezida Kabila byarangiye, maze agira ati: “Umva ibintu uko bishaka, natwe dufite uburyo bwo kubyumva.”
Mu buryo uyu munyamabanga uhoraho wa PPRD avuga ko buzabafasha gukomeza kuyobora iki gihugu kimaze imyaka isaga 20 mu ntambara z’urudaca ziterwa n’imitwe yitwaje ibirwanisho yagize iki gihugu indiri yazo, mu matora ateganyijwe kuwa 23 Ukuboza, yavuzemo ubushobozi bw’amafaranga iri shyaka rifite, ndetse n’umubare w’abayoboke rifite ngo uhagije.
Yaboneyeho gusaba abayoboke baryo kwitegura amatora avuga ko biteguye gutsinda mu nzego zose nk’uko radio Okapi dukesha iyi nkuru ivuga.
Ramazani akaba yaratangaje ibi kandi mu gihe abanyekongo batavuga rumwe kuri perezida Kabila bivugwa ko manda ye ya kabiri ari nayo ya nyuma yemerewe n’itegeko nshinga yarangiye mu Ukuboza mu 2016. Abatavuga rumwe n’ubutegetsi baaba basanga adakwiye no kuziyamamaza mu matora yo kuwa 23 Ukuboza 2018.
Emmanuel Ramazani ukuriye intumwa za PPRD, azakomereza ubukangurambaga muri Tshuapa, Mongala y’Amajyaruguru, na Ubangi y’Amajyepfo mbere yo gusubira I Kinshasa.
