Umutoniwase Linda wabaye igisonga cya kabiri mu irushanwa rya Nyampinga w’u Rwanda 2017, yahagurutse i Kigali yerekeza mu Mujyi wa Lagos mu ijoro ryo kuri uyu wa Gatanu, tariki 17 Ugushyingo 2017, aho azahatanira ikamba rya Miss University Africa.
Uyu mukobwa wari uherekejwe n’inshuti n’abavandimwe ku kibuga mpuzamahanga cya Kigali, yatangaje ko yishimiye guserukira u Rwanda kandi yifitiye icyizere cyo kuzatwara iri kamba.
Mu kiganiro aheruka kugirana n’ itangazamakuru, Mutoniwase yavuze ko yiyemeje kuzaserukira igihugu neza asaba Abanyarwanda kumushyigikira biciye mu matora yatangiye gukorwa mbere y’uko aba bakobwa 54 berekeza muri Nigeria.
Yagize ati “Igikenewe kugeza ubu ni uko bampa amahirwe binyuze kuri page y’irushanwa, ni ugukanda Like ku ifoto yanjye, umukobwa uzagira umubare munini w’abantu bakunze ifoto ye azahita abona amahirwe yo kujya mu icumi ba mbere.”
Umutoniwase n’abandi bakobwa bazaturuka mu bihugu hafi ya byose bya Afurika bagomba kuzagera mu Mujyi wa Lagos ahazabera irushanwa kuwa 17 Ugushyingo 2017.
Ahagarariye u Rwanda, nk’umwe mu bakobwa begukanye imyanya itatu ya mbere mu irushanwa rya Nyampinga w’u Rwanda 2017.
Nyampinga Iradukunda Elsa we ahagarariye u Rwanda mu irushanwa rya Miss World, rimaze iminsi ritangiye mu Bushinwa; Shimwa Guelda wabaye Nyampinga w’Umurage n’Umuco we yatumiwe mu irushanwa rya Miss Heritage Global riteganyijwe mu mpera z’umwaka.
