Ubuyobozi bw’ikipe ya Sunrise FC yo ku ntara y’i Burasirazuba mu karere ka Nyagatare bwatangaje Jackson Mayanja ariwe mutoza mushya w’iyi kipe.
ukomoka mu gihugu cya Uganda aje muri iyi kipe ihagaze ku mwanya wa nyuma asimbuye Muhire Hassan wamaze gutandukana n’iyi kipe kuwa mbere w’iki cyumweru.
Binyuze ku rubuga rwa X, ubuyozoi bw’iyi kipe bwatangaje ko Mayanja Jackson wigeze no gutoza mu ikipe ya AS Kigali ariwe mutoza mukuru kugeza ubwo uyu mwaka w’imikino wa 2023-2024 uzaba urangiye.
Muhire Hassan wari umutoza mukuru yatandukanye na Sunrise FC ku bwumvikane bw’impande zombi nyuma yaho umusaruro we wari muke kuva uyu mwaka w’imikino utangiye.
Hassan ari muri Sunrise FC yatoje imikino 8 ya shampiyona atsinda imikino ibiri akaba yatsinzwe indi itandatu, ibi butuma iyi kipe iri ku mwanya wa nyuma n’amanota atandatu.
Mayanja aje muri iyi kipe yitegura gukina n’ikipe ya AS Kigali kuri iki cyumeru mu mukino w’umunsi wa 10 wa shampiyona y’u Rwanda.
Ari mu Rwanda Mayanja w’imyaka 54 yatoje ikipe ya AS Kigali ari umutoza wungurije, yanatoje amakipe atandukanye arimo URA na KCCA zo muri Uganda ndetse na Kagera Sugar yo muri Tanzania.
