Kuri uyu wa gatandatu tariki 22 Gicurasi 2021 nibwo umuhanzi Ngabo Medard Jubert uzwi nka Meddy yasezeranye kubana akaramata na Mimi Mirage umukobwa ukomoka mu gihugu cya Ethiopia.
Ubu bukwe bwabereye muri Leta Zunze Ubumwe z’Amerika mu Mujyi wa Dallas aho uyu muhanzi Meddy asanzwe atuye, ni ibirori byari byitabiriwe n’ibyamamare bitandukanye bizwi hano mu Rwanda harimo K8 Kavuyo, Emmy, Adrien Misigaro, The Ben, Shaffy ndetse n’abandi.
Ubukwe bwa Meddy bubaye nyuma y’igihe kirekire uyu muhanzi akundana na Mimi dore ko ku mugaragaro uyu muhanzi yagaragaje umugore we mu gitaramo cyabereye i Kigali ndetse hakurikiraho no ku mwambika impeta amusaba ko babana mu kwezi k’Ukuboza 2020.
Nyuma yo gusezerana akaramata kuri abo bombi biteganyijwe ko aba bageni bazafata urugendo berekeza kwa Mimi muri Ethiopie nyuma bakazagera no mu rwa Gasabo kwireka umuryango w’umuhanzi Meddy.
