Polisi muri Kenya yatangiye iperereza ku mugabo w’umucuruzi uri kumwe n’abandi babiri bakora mu kigo cy’abinjira n’abasohoka, bashinjwa gutanga ibyangombwa bihimbano ku bantu barimo abo mu Rwanda.
Aba bantu ngo bakurikiranweho ko kuva mu mwaka wa 2012-2016, hari ibyangombwa bahaga abanyamahanga n’impunzi zo mu bihugu birimo u Rwanda mu gihe ari ibihimbano.
Abarimo gukurikiranwa ni umucuruzi Mohammed Ali Ahmed, na bagenzi be babiri aribo Nyamboke Omare na Joyce Kwamboka.
Bakurikiranweho ko kuva mu mwaka wa 2012 – 2016, ngo bajyaga batanga ibyangombwa bihimbano ku banyamahanga n’impunzi zirimo izo mu Rwanda, Ethiopia, Somalia, Congo na Sudani.
Keriako Tobiko ukurikiye Ubushinjacyaha muri Kenya, avuga ko aba bantu bose bakurikiranweho ibyaha 10, gusa bo barabihakana, nk’uko ikinyamakuru Nairobi news kibivuga.
Umucuruzi Mohammed Ali agomba kugezwa imbere y’ubutabera tariki ya 13 Ukuboza uyu mwaka, ngo akurikiranweho ibi byaha kimwe n’ibindi.
