Urubyiruko rw’Abahezanguni bahekuye u Rwanda rurakataje mu gupfobya Jenoside yakorewe Abatutsi

Abari ku isonga ni  JUSTINE NGENZI: Mwene Octavien Ngenzi
BERNADETTE NTUYAHAGA: Mwene Bernard Ntuyahaga.
NATACHA ABINGENEYE: Mwene Juvénal Uwiringiyimana.
PLACIDE KAYUMBA: Mwene Dominique Ntawukuriryayo
RUHUMUZA MBONYUMUTWA: Mwene Shingiro Mbonyumutwa
LILIANE BAHUFITE: Mwene Col Juvénal Bahufite.
RAISSA UJENEZA: Mwene Victoire Ingabire na JEAN PAUL NDINDAMAHINA.
Muri iyi nkuru sinshatse kugaruka ku mabi y’ababyeyi babo, gusa icyo bose bahuriyeho n’ingengabitekerezo ya MDR- Parmehutu yabibye inzangano mu bana b’ u Rwanda kugeza naho habaye Jenoside yahitanye inzirakarengane.

Mu minsi ishize nyuma y’urupfu rwa Thomas Ngeze, Mwene Hassan Ngeze, byinshi byaravuzwe ndetse urubyiruko rurimo Bernadette Ntuyahaga, batambutsa ubutumwa busa k’Intabaza ko bari mukaga ndetse abandi barimo Justine Ngenzi, batambutsa ubutumwa butabariza ba se ko barengana.

Mwibuke ko ababyeyi babo bari ibikomerezwa mu Rwanda aribo bateguye Jenoside ubundi bayishoramo rubanda rugufi, “Iyo  uru rubyiruko rwihandagaza rukavuga ko ba se naba nyina  barengana  [ Justine Ngenzi ] ubwo ruba rushaka kuvuga ko ya Jenoside yiteguye ndetse ikanikora!?”

Reka rero mbabwire, Kimwe nuko ba se naba nyina bahombeye mubyo bakoze  ndetse bagahombya n’ u Rwanda,  ariko haracyari amahirwe kuri uru rubyiruko kuko u Rwanda  rurabategereje kuza gufatanya n’abandi kubaka igihugu cyabo kimaze gutera imbere kuburyo bugaraga, haracyari amahirwe kuri bo kuko Perezida Kagame akiyoboye uru Rwanda, muri politiki ye nziza itavangura ahubwo iha buri wese amahirwe yo kwiteza imbere. Mugihe rero  bagifata ibitekerezo by’ivangura bya ba se na banyina  nka role models, birabagoye cyane kuzitandukanya nibibi bakoze, ibi nibyo bituma tuvuga ko “uwonse amacakubiri ntakiza cyamuvaho!”.

Mwibuke ko iri tsinda ry’abanyarwanda baba mu buhungiro bahuriye muri Jambo asbl ari naryo rikomeje guteza impagarara mu banyarwanda batuye mu  gihugu cy’Ububiligi .

Ku wa 1 Werurwe 2018 hari hateganijwe  ikiganiro mpaka  mu Inteko Nshingamategeko y’u Bubiligi, cyateguwe nir’Ishyirahamwe « Jambo asbl » rikorera mu Bubiligi, rizwi nk’abahezanguni mu guhakana no gupfobya Jenoside yakorewe Abatutsi.

Ambasade y’u Rwanda mu Bubiligi yamaganye iki  kiganiro mbwirwaruhame cyari kigamije gukoma mu nkokora kwemeza itegeko ryo guhana abahakana Jenoside yakorewe Abatutsi mu 1994.

Inkomoko y’ibi byose ariko  ni umushinga w’itegeko inteko nshingamategeko y’Ububiligi yashakaga  kuvugurura hakongerwa ingingo zihana ihakana n’ipfobya rya Jenoside yakorewe Abatutsi muri 1994. Abadepite b’ababiligi bifuza ko byajya mw’itegeko nkuko byakozwe kuri Jenoside yahorewe abayahudi.

Byaje gushimangirwa n’Abakuru b’ibihugu   na za Guverinoma bigize Umuryango wa Afurika Yunze Ubumwe, AU, bemeje ko itariki ya 7 Mata buri mwaka, ari Umunsi w’Umuryango wa Afurika Yunze Ubumwe wo Kwibuka Jenoside yakorewe Abatutsi mu 1994 mu Rwanda, usimbura inyito yari imaze igihe ikoreshwa.

Uyu ni umwe mu myanzuro yafatiwe mu nama ya 31 Isanzwe y’Abakuru b’Ibihugu na Guverinoma bigize AU, yaberaga i Nouakchott muri Mauritania.

Ukaba ufashwe nyuma y’uko Inteko Rusange y’Umuryango w’Abibumbye, muri Mutarama yatoye ko uwa 7 Mata buri mwaka, uva ku kuba “Umunsi Mpuzamahanga wo kuzirikana kuri Jenoside yo mu 1994 mu Rwanda” byavugwaga guhera mu 2004, ukaba “Umunsi mpuzamahanga wo kuzirikana kuri Jenoside yakorewe Abatutsi mu 1994 mu Rwanda”.

Abakuru b’ibihugu bya AU bashimangiye ubushake bwabo mu kurwanya amakimbirane n’uko bakwiye kurushaho kurwanya ingengabitekerezo y’urwango, Jenoside n’ibyaha bishingiye ku rwango muri Afurika.

Umwanzuro wa 19 uvuga ko bemeje umwanzuro w’Akanama Gashinzwe amahoro n’Umutekano, PSC, wafatiwe mu nama ya 761 yabaye ku wa 5 Mata 2017 i Addis Ababa, “ugira tariki ya 7 Mata buri mwaka, Umunsi wa Afurika Yunze Ubumwe wo Kwibuka Jenoside yakorewe Abatutsi mu 1994 mu Rwanda.”

Ukomeza ugira uti “Inteko rusange yanemeje umwanzuro wa PSC wakosoye inyito ya Jenoside yakorewe Abatutsi mu Rwanda, iba ‘Jenoside yakorewe Abatutsi mu 1994 mu Rwanda.”

Leta y’u Rwanda yakunze kuvuga ko kugaragaza neza ibyabaye n’amagambo akoreshwa ni ingenzi cyane igihe havugwa kuri Jenoside, kuko hari abakomeza gukoresha imvugo ifutamye bagambiriye kuyihakana no kuyipfobya.