Agashya kuri Bebe Cool wanaririmbye mu kinyarwanda mu mashusho y’indirimbo ‘I DO’ yakoranye na Charly na Nina(VIDEO)

Mu minsi ishize nibwo abahanzikazi Charly na Nina batangaje ko bagiye gushyira hanze indirimbo yabo nshya ‘I do’ iyi ikaba indirimbo bakoranye n’umuhanzi w’icyamamare Bebe Cool, iyi ndirimbo yasohokanye n’amashusho yayo yumvikanamo uyu mugabo w’icyamamare muri Uganda aririmba ikinyarwanda kimwe mu dushya tw’iyi ndirimbo.

Ubundi inkuru yari igezweho y’aba bakobwa ni uko hari indirimbo yabo na Sheebah Karungi bavanywemo bagasimbuzwa Bruce Melody ibyo bo batangaje ko ntacyo bibatwaye cyane ko indirimbo yari iya Sheebah bityo kuba yabakuramo ntakibazo ahubwo bo batangaza ko barajwe ishinga n’indirimbo yabo bwite arinayo bakoranye na Bebe Cool bakayita ‘I Do’ arinayo bashyize hanze kuri uyu wa Kabiri tariki 24 Mata 2018.

Iyi ndirimbo nubwo ari iyaba bahanzikazi ba hano mu Rwanda yakorewe ijana ku ijana muri Uganda yaba mu buryo bw’amajwi cyane ko amajwi yayo yatunganyijwe na Producer Ronny ukorera muri Power Records mu gihe amashusho yayo yafashwe akanatunganywa na Sasha Vybz uyu we unamenyerewe mu gukorera aba bahanzikazi amashusho y’indirimbo.

Reba amashusho y’indirimbo I Do ya Bebe Cool yakoranye na Charly na Nina