Bruce Melody yegukanye Primus Guma Guma Super Star 8

Uyu muhanzi yegukanye umwanya wa mbere bigaragara ko ari we wari ukunzwe kurusha abandi kandi aririmba abantu benshi bakagaragaza ibyishimo kurusha uko babigaragarizaga abandi bahanzi bari kurushanwa.

Mu bitaramo bitandukanye byagiye bibera mu mpande zigize igihugu, uyu muhanzi yakomeje kuza ku isonga ku buryo byatumaga benshi bamuha amahirwe yo kuba yakwegukana iri rushanwa.

Mu biganiro bitandukanye yagiye agirana n’itangazamakuru mbere y’uko irushanwa risozwa, Bruce Melody yavugaga ko byanze bikunze ari we ugomba kwegukana irushanwa.

Nta cyahindutse cyane ku ntonde zagiye zikorwa kuko akenshi abigaranzuraga abandi mu irushanwa mu bitaramo byagiye biba niko baje imbere. Byavugwaga kandi ko Bruce Melody na Christopher bayingayingana mu buhanga n’igikundiro gusa birangiye Bruce Melody aje ku mwanya wa mbere.

Abahanzi baje muri batanu ba mbere

5 .  Queen Cha yahembwe miliyoni eshatu (3)

4 . Uncle Austin yahembwe miliyoni 3,5

3 . Active bo bahembwe miliyoni 4

2 . Christopher ahembwe miliyoni 4,5

1 . Bruce Melody ahembwe miliyoni 20

Uko igitaramo cyagenze……………..

I Gikondo ahasanzwe habera Expo niho hateraniye abakunzi b’ umuziki Nyarwanda baje kureba umuhanzi uza kwegukana irushanwa rya Primus Guma Guma Super Star ya munani.

Byari urugendo rutoroshye ku bahanzi 10 bahatanye muri iri rushanwa, banyuze mu turere dutandukanye harimo Gicumbi, Huye, Musanze na Rubavu ibyo bakoze barabihemberwa.

Abatuye mu mujyi wa Kigali batangiye kugera i Gikondo nko ku isaha ya saa kumi n’ imwe z’ umugoroba aho mu myanya y’ icyubahiro bishyuraga ibihumbi bitanu naho ahasanzwe bakishyuzwa igihumbi gusa.

Nubwo byari bishyuje abantu  benshi baje gushyikira umuhanzi bakunda hagati ya ‘Active, Just Family, Khalfan, Jay C, Bruce Melody, Christopher, Young Grace, Queen Cha, Uncle Austin na Mico The Best.

MC Buryohe na Dj Ira nibo babanje gususurutsa abantu bitabiriye iki gitaramo mbere y’uko abahanzi 10 batangira kuririmba.

Abagize akanama nkemurampaka barimo Manzi Lion, Twahirwa Aimable na Tonzi bamaze kugera mu myanya yabo, nibo bari bahanzwe amaso cyane kuko aribo bari bafite  uruhare runini mu itangwa ry’ igikombe.

Uyu munsi kandi twabibutsako hahembwe abahanzi babiri harimo uwegukanye  irushanwa  wahawe miliyoni 20 ndetse nuwarushije abandi mu kugira amajwi yo gutorwa binyuze ku mifuniko nawe wahawe  miliyoni 15.

Saa moya n’ iminota 15 nibwo umuhanzi wa mbere yagiye ku rubyiniro.

Bruce Melody wari mu bahabwa amahirwe niwe wabanje kuririmba yahereye ku ndirimbo yitwa ‘Ntundize’.

Yaririmbye abafana basa nkaho bagikonje abandi barimo kwinjira. Izindi ndirimbo yaririmbye ‘Ikinya’na ‘ Ndumiwe’.

Khalfan niwe waririmbye bwa kabiri. Uyu muhanzi w’ umuraperi yakoze agashya aza ku rubyiniro azanywe mu isanduku iyingurwamo abapfu.

Ubwo iyo sanduku yafungurwaga ngo uyu muhanzi ayivemo hari harimo n’ inuma. Yahereye ku ndirimbo yitwa ‘Ibaruwa’ abafana bitegerezaga ibyo akora n’ amatsiko menshi banyuzwe n’ uburyo uyu musore yari yateguye urubyiniro.

Aririmba yanyuzagamo agasaba abafana bakunda injyana ya Hip Hop gushyira amaboko hejuru bakamushyigikira. Izindi ndirimbo yaririmbye ni ‘Nabimenye ugiye’ yakoranye na Active na ‘Nabo Sibo’.

Khalfan yakurikiwe na mugenzi we w’ Umuraperi Jay C. Yahereye ku ndirimbo yitwa ‘Sibomana’, yakurikijeho ‘ I’m back’ yakoranye na Bruce Melody asoreza ku ndirimbo yitwa ‘Isugi’.

Christopher niwe wakurikiyeho yahereye ku ndirimbo yitwa ‘ Ijuru Rito’, akurikizaho iyitwa ‘Uwo munsi’, asoreza kuri ‘ Arahagije’ yahise ishyushya abafana be bakabyina.

Itsinda ry’ abanyamujyi rya Active niryo ryakurikiyeho, mu myambaro y’ amakote barimbanye, bahereye ku ndirimbo yitwa ‘ Aisha’. Bakurikizaho iyitwa ‘Lift’, basoreza kuri ‘Final’.

Nyuma ya Active hakurikiyeho umuhanzi Mico The Best, yagiye ku rubyiniro yitwaje umukobwa ngo ushotorana ari nayo ndirimbo yahereyeho aririmba. Bwa kabiri yaririmbye indirimbo yitwa ‘Akabizu’ asoreza ku ‘Umugati’.

Queen Cha witabiriye iri rushanwa inshuro ebyiri yahereye ku ndirimbo yitwa ‘Kizimyamwoto’ nawe yishimiwe cyane ko yanyuzagamo akabyinana nabo yateguye bamubyinira. Izindi ndirimbo yaririmbye ni ‘Isiri’ na ‘Umwe rukumbi’.

Just Family igizwe na Bahati, Chris na Jimmy bahereye ku ndirimbo yitwa ‘ Mureke Agende’, bakurikizaho ‘ Bareke’ basoreza kuri ‘ Hummer’ bakoranye na Bull Dogg.

Uncle Austin uje muri iri rushanwa bwa mbere aririmba yahereye ku ndirimbo yitwa ‘ Everything’ yakoranye na Meddy. Yishimiwe cyane kurenza abandi bahanzi bamubanjirije. Izindi ndirimbo yaririmbye ni ‘Nzakwizirikaho’ na ‘Ibihe byose’.

Mu bahanzi 10 bari bitezwe uyu munsi Young Grace niwe waririmbye bwa nyuma yahereye ku ndirimbo ‘ Hello Boss’, akurikizaho ‘Hip Hop Game’, asoreza kuri ‘Whisky ya Papa’.

Saa yine nibwo abahanzi bose bari basoje kuririmba.

Abagize akanama nkemurampaka bagiye mu mwiherero no kwegeranya amanota yose kugirango baze kugaruka batangaza umuhanzi  waje kwegukana irushanwa rya Primus Guma Guma Super Star ya munani.