Mukabalisa Donatille wari usanzwe ayobora Inteko Ishinga Amategeko, yongeye gutorerwa kuyiyobora muri manda nshya y’imyaka itanu.
Amatora ya Perezida w’Inteko Ishinga Amategeko yabaye kuri uyu wa 19 Nzeri 2018 nyuma y’umuhango w’irahira ry’abadepite bashya 80.
Nkuko bisanzwe biro y’Inteko Ishinga Amategeko iyo imaze gutorwa, ihita irahirira inshingano nshya iba ibonye nyuma nayo ikazashyiraho abayobozi ba za Komisiyo.
Biro ntabwo ishobora kuyoborwa n’abagabo gusa, kuko mbere y’itora baba habayeho ibiganiro ku buryo buri mutwe wa politiki witabira inama y’Inteko Rusange witeguye; byose ariko bikorwa mu ibanga.
Depite Izabiriza Marie Mediatrice, niwe wamamaje Mukabalisa Donatille uturuka muri PL. Yavuze ko ari umugore ufite imyaka 58, wubatse ndetse n’abana batatu.
Ati “Yuje ubuhanga n’ubushishozi, afite ubunararibonye mu mikorere y’inteko kuko kuva mu 2000 kugera mu 2018, uretse imyaka itatu ni yo atabaye mu Nteko”. Imyaka itatu yonyine ni yo atari umudepite kuko yari umusenateri.
Mukabalisa yabajijwe niba yemeye kuba yamamajwe, asubiza avuga ko abyemeye.
Ni we mukandida wenyine wahataniye uyu mwanya nyuma y’uko undi wiyamamaje, Ruku John Rwabyoma, yagonzwe n’ingingo y’Itegeko Nshinga ivuga ko Perezida w’Inteko Ishinga Amategeko atagomba kuva mu mutwe umwe wa Politiki na Perezida wa Repubulika.
Rwabyoma yahise avuga ko ashyigikiye Mukabalisa wari usanzwe ayobora Inteko.
Mukabalisa wari umukandida rukumbi, yatowe n’abadepite 80 kuri 80 batoye.
Inteko Ishinga Amategeko ya mbere yayobowe na Mukezamfura Alfred wa PDC, asimburwa na Mukantabana Rose utari ufite ishyaka arimo, iya gatatu iyoborwa na Mukabalisa Donatille wa PL.
Nyuma ya Jenoside yakorewe Abatutsi, Nkusi Juvenal wa PSD ni we wahise ayobora Inteko, akurikirwa na Joseph Sebarenzi wari muri PL na Vincent Biruta wa PSD.
Rebero Jeremy
Byenda gusetsa! Perezida yavuzeko inteko icyuye igihe itakoze neza bihagije kandi yariyobowe na Donatille. Nonese niba agawe atorewe kuzagawa birenze ibyo? Abazi abatorewe kuyobora inteko nshya bavuzwe ibigwi ariko bose bagaragajeko tudateye intambwe ijya imbere. Uretse nyine Donatille wagawe, batwibukijeko uwitwa Fazil nta musaruro yatanze muri minisiteri yayoboye. Igishekeje kuruta ibindi nuko basubiye mu magambo yivugiye ko iyo abonye Kagame, areba hasi agahinda imishyitsi. Uwo se niwe twategaho kuzabaza governema ibyo ikora? Undi mutegarugori we ngo kujya mu nzego kwe bishingiye kuri ruswa y’igitsina! Tekereza iyo nteko! Muri make, birababaje!