Abanyarwanda 25 kuri uyu wa kane ushize, itariki 11 Ukwakira bakatiwe igifungo cy’umwaka umwe n’urukiko rwo muri Kisoro nyuma yo kubahamya kwinjira muri Uganda mu buryo bunyuranyije n’amategeko.
Urukiko ruyobowe n’umucamanza Raphael Vueni rwumvise ubushinjacyaha buyobowe n’umushinjacyaha wa Kisoro, Mike Mwanje, buvuga ko kuwa 11 Ukwakira 2018, abakekwa bafatiwe ku muhanda wegereye Ishuri Ribanza rya Nyakabande.
Mwanje akaba yabwiye urukiko ko abafashwe basanzwe nta byangombwa by’inzira bafite kandi binyuranyije n’ingingo ya 53 yo mu gitabo cy’amategeko ahana ya Uganda nk’uko iyi nkuru dukesha Chimpreports ikomeza ivuga.
Aba banyarwanda bose ngo bakaba baremeye icyaha ndetse basaba imbabazi.
Ubusanzwe ngo icyaha cyo kwinjira ku butaka bwa Uganda mu buryo bunyuranyije n’amategeko uri umunyamahanga bihanishwa igifungo cy’imyaka 2 cyangwa amande ya miliyoni 2 z’Amashilingi ya Uganda, cyangwa ugahabwa ibihano byombi.
