Umunya-Ethiopia, Mulu Kinfe Hailemichael ukinira Delko Marseille Province yo mu Bufaransa ni we wegukanye agace ka kabiri k’isiganwa ry’amagare mpuzamahanga rizenguruka u Rwanda kakinwe kuri uyu wa Mbere tariki 24 Gahyantare.
Ni isiganwa ryavaga mu Mujyi wa Kigali ryerekeza mu karere ka Huye, ku ntera ya kilometero 120 na metero 500.
Hailemichael yegukanye agace ka kabiri ka Tour du Rwanda nyuma yo gutanga ku murongo abandi bakinnyi 43 bageze i Huye banganya na we ibihe.
Cyakora cyo n’ubwo uyu musore yegukanye aga gace, ntibyamuhesheje umwambaro w’umuhondo kuko ugifite na Yegvoniy Fedorov, Umunya- Kazakhstan wegukanye agace ko ku munsi w’ejo.
Umunyarwanda waje hafi muri aka gace ka kabiri ni Munyaneza Didier ukinira Benediction Ignite wageze i Huye ari uwa kane.
Undi Munyarwanda waje hafi mu gace k’uyu munsi ni Areruya Joseph wageze i Huye ari uwa munani, Byukusenge Patrick wahageze ari uwa 15, Hakizimana Seth wahageze ari uwa 18 na Habimana Jean Claude wahageze ari uwa 21.
Uko abasiganwa bakurikiranye mu gace ka Kabiri ka Tour du Rwanda 2020
Ku munsi w’ejo abasiganwa bazahaguruka i Huye berekeza i Rubavu, ku ntera y’ibirometero 214 ari na yo ndende kurusha izindi muri Tour du Rwanda y’uyu mwaka.
