Ubwo hakinwaga imikino yo kwishyura ya 1/8 cy’irangiza mu irushanwa ry’igikombe cy’Amahoro amakipe atandukanye yakomeje mu kindi kiciro nyuma yo kwitwara neza mu mikino yo kwishyura, aha twavuga nka Rayon Sports, AS Kigali ndetse na Bugesera nizo ziyongereye kuyandi makipe yageze muri 1/4.
Ku mukino wabanjirije iyindi yabaye kuri uyu wa gatatu, ikipe ya AS Kigali yaraye isezereye ikipe ya Etincelles FC ku giteranyo cy’ibitego bibiri kuri bibiri, ni nyuma yaho amakipe yombi yari yarangije ari 0-0, ikipe y’Abanyamujyi ikaba yakomeje ku bitego 2 yatsindiye hanze mu mukino ubanza.
Nyuma y’uyu mukino wabereye kuri Sitade ya Kigali i Nyamirambo, hakurikiyeho umukino w’ikipe ya Rayon Sports yatsinze ikipe ya Musanze FC ibitego 3-1, ni nyuma yaho mu mukino ubanza wari wabereye i Musanze amakipe yombi yari yanganyije ubusa ku busa.
Ikipe ya Rayon Sports izwi nka Gikundiro yaraye itsindiwe na Nishimwe Blaise watsinze igitego ku munota wa 24, yongera gutsinda ikindi gitego ku munota wa 56 cyatsinzwe na Niyigena Clement icyanyuma gitsindwa na Musa Esenu ku munota wa 70, ku ruhande rwa Musanze FC igitego kimwe cyatsinzwe na Samson Ikecukwu kuri penaliti.
Mu karere ka Bugesera, habereye undi mukino wa 1/8 cy’irangiza wasize ikipe ya Bugesera FC ibonye intsinzi y’igitego kimwe ku busa bwa Gicumbi FC, ni igitego cyatsinzwe na Muniru Abdoul ubwo hari ku munota wa 13 w’umukino.
Rayon Sports, As Kigali ndetse na Bugesera FC yiyongereye kuri Police FC, Marines FC, Etoile de l’Est na Gasogi United zo zamaze kugera muri 1/4 cy’iri rushanwa.
Ikipe imwe isigaye iraboneka kuri uyu wa kane, aho hari umukino uri buhuze ikipe y’ingabo z’igihugu ya APR FC iri bwakire Amagaju FC ku mukino uri bubere kuri Sitade ya Kigali i Nyamirambo guhera ku isaha ya Saa cyenda, mu mukino ubanza wari wabereye i Nyamagabe APR FC yari yatsinze igitego kimwe ku busa.
