Ubwo hasozwaga imikino ibanza ya 1/4 cy’igikombe cy’Amahoro, ikipe ya APR FC yaraye ibonye amanota 3 abanza mu mukino baraye bahuyemo n’ikipe ya Marines FC yo mu karere ka Rubavu, ni umukino warangiye ikipe y’ingabo z’igihugu itsinze 2-0.
Muri uyu mukino ikipe ya APR FC niyo yatangiye neza kuko yabonye igitego hakiri kare, kuko ubwo hari ku munota wa 15 w’umukino rutahizamu wayo Kwitonda Alain uzwi nka Baca yafunguye amzamu ya Marines FC.
Ntibyaje gutinda kuko ubwo hari ku munota wa 39 nanone uyu musore yaboneye ikipe y’ingabo z’igihugu ikindi gitego ari nacyo cyashoje uyu mukino wa none, bivuze ko uko igice cya mbere cy’umukino cyarangiye ari nako umukino wose warangiye ari 2-0.
Usibye uyu mukino waraye ubaye kuri uyu wa Gatatu, ikipe ya Rayon Sports yo yatsinze ikipe ya Bugesera igitego kimwe ku busa, ni umukino wari wabereye kuri Sitade ya Kigali i Nyamirambo, ni igitego cyatsinzwe na Musa Esenu.
Mbere y’uyu mukino ho ikipe ya AS Kigali ifite umutoza mushya ariwe Casa Mbungo Andre yatsinze ikipe ya Gasogi United igitego kimwe ku busa cyatsinzwe na Rutahizamu Hussein Shabalala.
Mu karere ka Ngoma, ikipe ya Etoile de l’Est yo yari yakiriye ikipe ya Police FC, uyu mukino warangiye ikipe ya Polisi y’igihugu itsinze ibitego bibiri kuri kimwe cya Etoile de l’Est, ni ibitego byatsinzwe na Ndayishimiye Dominique ndetse na Twizerimana Martin Fabrice.
Biteganyijwe ko imikino yo kwishyura ya 1/4 cy’igikombe cy’Amahoro izakinwa mu cyumweru gitaha cy’intangiriro z’ukwezi kwa Gicurasi 2022.
