Kuri iki cyumweru tariki ya 25 Ukwakira 2021 kuri Sitade Amahoro i Remera habereye umuhango w’ikipe ya Rayon Sports usanzwe ukorwa buri mwaka mbere y’uko shampiyona itangira gukinwa, ni igikobwa cyitwa “Rayon Sports Day” kiba kigamije kwerekana abakinnyi bashya bazakoreshwa muri uwo mwaka w’imikino.
Iki gikorwa cyatangiye mu masaha y’amanywa cyaranzwe no kwerekana abakinnyi bashya Gikundiro izakoresha mu mwaka w’imikino wa 2021-2022 ndetse bakanahabwa nimero zabo bazaba bambaye ku myenda, ikindi ni igikorwa cyaranzwe no kuririmba kw’abahanzi bari batumiwe barimo Sky2 Wabagahe, Eric Sendeli, Symphony Band ndetse n’abandi batandukanye.
Hanagaragajwe kandi ko umukinnyi Muhire Kevin uzwi nka Rooney wahawe amasezerano nyuma y’abandi bakinnyi bose muri uyu mwaka w’imikino ariwe uzaba ari kapiteni wa Rayon Sports muri uyu mwaka w’imikino ugiye gutangira kuri uyu wa gatandatu by’umwihariko Rayon Sports ikazatangira ikina Mukura VS bakinire kuri Sitade ya Kigali iherereye i Nyamirambo.
Nyuma yaho kandi nibwo habaye umukino wa Gicuti wahuje Gikundiro na Kiyovu SC, ni umukino warangiye Rayon Sports itsinzwe ibitego bibiri kuri kimwe, ni ibitego byatsinzwe na Bigirimana Abedi ndetse na Mugenzi Bienvenu ku ruhande rwa Kiyovu SC ndaho kuri Rayon Sports yo yatsindiwe na Essombe Willy Onana.
Usibye uyu mukino kandi habayeho kwakira abafana ku kibuga bari bamaze hafi umwaka n’igice urenga batagera ku kibuga, kuri iyi ncuro abitabiriye iki gikorwa babanje kwerekana ko bikingije Covid-19 ndetse kandi ko bipimishije Koronavirusi bakagaragaza ko nta bwandu bafite.
