Sénégal yabimburiye andi makipe kugera muri ½ cy’Igikombe cya Afurika kiri kubera mu Misiri ubwo yatsindaga Bénin igitego 1-0 mu gihe Nigeria yakomeje isezereye Afurika y’Epfo mu mukino yayitsinzemo ibitego 2-1 kuri uyu wa Gatatu.
Sénégal yari yasezerewe muri ¼ mu irushanwa riheruka kubera muri Gabon mu 2017, yihariye uyu mukino wa ¼ ibona uburyo bwinshi burimo n’ibitego bibiri byanzwe.
Bénin yashobora gufungura amazamu ku buryo bwabonetse ku munota wa 25, Mickael Poté akojejo agatsitsino ku mupira wari uturutse kuri coup-franc yatewe na Cebio Soukou, uca ku ruhande rw’izamu.
Nyuma y’iminota itandatu na Henry Saivet wa Sénégal, yateye umupira w’umuterekano wanyuze ku ruhande rw’izamu ubwo Khalidou Koulibaly yananirwaga kuwugeraho ngo awerekeza mu nshundura.
Sénégal yatsindiwe na Sadio Mané n’umutwe ku munota wa 52, umusifuzi wo ku ruhande avuga ko habayeho kurarira.
Umunyezamu wa Sénégal Alfred Gomis yagize amahirwe adasanzwe ubwo yari ahawe umupira na myugariro we, awukozeho n’ikirenge uca gato ku ruhande rw’izamu ahagana ku munota wa 65.
Iyi kipe iri mu zihabwa amahirwe yo kwegukana iri rushanwa, byayisabye gutegereza umunota wa 69, ifungura amazamu ku gitego yatsindiwe na Idrissa Gan Gueye wacomekewe umupira na Sadio Mané wacenze abakinnyi batatu, asiga ba myugariro ba Bénin bari bamuri inyuma, aroba umunyezamu Saturnin Allagbé.
Nyuma y’iminota itatu, Sadio Mané yongeye kurunguruka mu izamu rya Bénin, ku nshuro ya kabiri, umusifuzi wo ku ruhande avuga ko yarayemo ndetse bishimangirwa n’ikoranabunga ry’amashusho rizwi nka VAR ryatangiye kwifashishwa uyu munsi muri iri rushanwa.
Habura iminota umunani ngo umukino urangire, Bénin yahawe ikarita itukura kuri Olivier Verdon wagushijwe Gana Gueye inyuma gato y’urubuga rw’amahina, asiga bagenzi be ari 10 mu kibuga.
Umukino warangiye habonetsemo igitego kimwe gusa, Sénégal ikatisha itike ya ½ yaherukaga kugeramo mu 2006, aho kuri iyi nshuro izahura n’ikipe ikomeza hagati ya Madagascar na Tunisia zizakina kuri uyu wa Kane.
Undi mukino wa ¼ wabaye kuri uyu wa Gatatu, warangiye Nigeria itsinze Afurika y’Epfo ibitego 2-1.
William Troost-Ekong yatsinze igitego cyagejeje igihugu cye muri ½ habura umunota umwe ngo umukino urangire.
Samuel Chukwueze yari yafunguye amazamu ku ruhande rwa Nigeria ku munota wa 27 mu gihe Bongani Zungu yishyuriye Afurika y’Epfo habura iminota 19 ngo umukino urangire.
Nigeria izahura n’ikipe izarokoka hagati ya Algérie na Côte d’Ivoire zizahura kuri uyu wa Kane mu mukino wa 1/4 uzabera mu Mujyi wa Suez.
