Amafaranga agera kuri miliyoni 11 z’amadolari yaburiwe irengero mu isanduku ya Leta ya Gambia nyuma y’igenda rya Yahya Jammeh wahiritswe k’ubutegetsi biciye mu matora y’umukuru w’igihugu.
Jammeh wari wanze kurekura ubutegetsi yemeye kuva ku butegetsi kuwa Gatandatu ndetse ahita yurira indege agana iy’ubuhungiro mu gihugu bikekwa ko ari Guine Eqautoriale.
Umunya-Senegal ushinzwe ibikorwa by’ingabo zari zoherejwe kuvana Jammeh ku butegetsi Mai Ahmad Fatty yavuze ko ubu miliyoni 11 zaburiwe irengero.
BBC dukesha iyi nkuru yatangaje ko imodoka z’agaciro kenshi zagaragaye zipakirwa mu ndege itwara imizigo yo muri Chad umunsi Jammeh ava mu gihugu.
Fatty yavuze ko abakozi bo muri Minisiteri y’imari batangaje ko isanduku isa n’aho isigayemo ubusa kandi ngo ni nako bimeze muri Banki Nkuru y’Igihugu.
Fatty yavuze ko Jammeh ashobora kuba ari we wayatwaye mu byumweru bibiri bishize.
Ibi bibaye mu gihe hari hatanzwe itegeko ry’uko nta kintu na kimwe cya Jammeh cyemererwa kurenga ikibuga cy’indege.
Hari amakuru avuga ko imitungo ya Jammeh iri muri Guinea aho akekwa kuba yahungiye.
Yahya Jammeh yurira indege agana iy’ubuhungiro mu gihugu cya Guine Eqautoriale.
