Hari Akagambane Ko Kuzana Kayumba Nyamwasa Kumutuza Muri Uganda

Amakuru  aturuka ahizewe aratubwira ko hari umugambi wo gutuza Kayumba Nyamwasa muri Uganda, nyuma yaho Perezida w’Afrika y’Epfo  Cyril Ramaphosa, aheruka muri  Uganda mu bukwe bw’umuhungu we  bwabaye  mu ntangiriro za Kanama 2018.  Ubu bukwe bwabereye ahitwa Kololo i Kampala, bwitabiriwe na Perezida Yoweri Museveni, ibintu byatunguye abanyayuganda benshi cyane ko adacana uwaka na Amama Mbabazi, yari atahiye ubukwe.  Museveni yirengagije kutumvikana muri politiki kwamuranze hagati ye na Amama Mbabazi wamubereye Minisitiri w’Intebe igihe kirekire ndetse nyuma bakaza guhatana mu matora.

Ibi rero byaje gutahurwa  na Rushyashya ko icyari kihishe inyuma y’ibi byose yari amayeri  ya Perezida Museveni kuri ubu weruye mu kugambanira u Rwanda, ko arimo gutegura uko Kayumba Nyamwasa yakurwa muri Afrika y’Epfo akaba yatuzwa muri Uganda. Niyo mpamvu icyari  ubukwe  cyaje guhinduka inama yabaye mu ibanga rikomeye  hagati ya Perezida Museveni na  Perezida Ramaphosa wa Afrika y’Epfo.

Museveni n’umugore we bari bitabiriye ibirori biba mu bukwe bw’Abanyankole bikabera iwabo w’umukobwa ufite ubukwe, ibyo bita (Kuhingira), aha umugeni bamuhuza n’umuryango w’umusore wamusabye, ndetse agasuhuza sebukwe. Abavandimwe n’inshuti zo ku ruhande rw’umukobwa bamuha impano.

Perezida Museveni asuhuza Amama Mbabazi, badacana uwaka.

Aya makuru avuga ko Perezida  Ramaphosa yasabye Perezida Museveni ko yareba aho ashyira Kayumba Nyamwasa kuko amaze kurambirana muri Afrika y’Epfo kandi bikaba bimuteranya n’inshutiye Perezida w’u Rwanda Paul Kagame, Perezida Ramaphosa ngo yabwiye Museveni ko Kayumba  yaje muri Afrika y’Epfo avuye Kampala –Uganda, kandi akaba yari afite icyemezo [Recommendation], aricyo Perezida wariho Jacob Zuma yashingiyeho amuha ubuhungiro.

Ikindi ngo Kayumba yagombaga kuva muri Afrika y’Epfo agashaka ahandi yerekeza umwaka ushize 2017, yongererwa igihe [prolongation]  kuko aba muri Afrika y’epfo muburyo munyuranije n’amategeko, ariko bakomeza kumwihanganira. ati :Ibi bitwara amafaranga menshi y’igihugu agenda kuba murinda [Haute Sécurité.] yasabye ndetse no kubimutunga kuko ntabyangombwa agira byo kuba muri Afrika y’epfo nk’impunzi kandi akaba atakwirukanwa kuko byaba binyuranije n’amasezerano ya Geneve agenga impunzi.

Ibi ariko ngo byaba byaratewe n’uko hari ibikorwa by’urugomo byakozwe n’abayoboke ba RNC, byabereye muri Afrika y’epfo, ubwo Perezida Kagame yitabiraga inama ya 10 y’Umuryango w’ibihugu biri kwihuta mu iterambere ry’ubukungu uzwi nka “BRICS” yatangiye kuwa 25 Nyakanga igasozwa kuwa 27 Nyakanga 2018.

Perezida Museveni ngo yaba yarasubije mugenzi we w’Afrika y’epfo Perezida Ramaphosa ko yaba abahaye igihe bakareba uko babigenza.

Aya makuru avuga ko mu minsi ishize muri UK, no mu Bufaransa habereye inama za RNC, zo kureba uko Kayumba yakwimurwa naho yakwimukira  nkuko byari byasabwe na Perezida Museveni, umwanzuro wabaye uwo kuzana Kayumba kumutuza muri Uganda, ahari ibikorwa bya RNC, byo guhungabanya umutekano w’u Rwanda, akegera u Rwanda.

Uganda rero iri mu myiteguro yanyuma yo kureba aho yatuza Kayumba Nyamwasa n’uko yamurindira umutekano, hari amakuru avuga ko Kayumba, amaze iminsi agenda genda muri iki gihugu, akaba agaragara mudece dutandukanye twa Uganda nka Migera, Gasese, Bururi,Kigumba,Masindi, Ngoma Luwero, Bugungu Wanseko n’ahandi.., aho ashakisha abayoboke.

Andi makuru avuga ko Perezida Museveni, yamaze gusaba Perezida w’u Burundi Pierre Nkurunziza ko yakwemera gukorana na Kayumba Nyamwasa cyangwa se akamuvanaho amaboko , impamvu nyamakuru ni uko u Burundi bwaba inzira ihungabanya umutekano w’u Rwanda kurusha uko RNC, yaturuka muri Uganda igahungabanya umutekano mu Rwanda.

Ikibazo ariko Kayumba ngo yavugaga ko Nkurunziza yica buri mututsi wese uvuye mu Rwanda, bityo n’aba RNC, bashobora kubigwamo, hakaba hari na Calixte Sankara wirirwa usakuza ko ari mu nyungwe kandi ari i Burundi. Perezida Museveni ngo akaba yarasabye Nkurunziza ko yaca ako kavuyo akemera gukorana na Kayumba gusa kandi ko atakongera kwica abatutsi, ati : Ntitwakorana wica abatutsi, bishyire hasi maze ngushakire abantu bagufasha kwikiza umuturanyi. Ngayo nguko.