Mu gihugu cy’u Burundi haravugwa ifatwa ry’imodoka 10 zo mu bwoko bwa Mitsubishi ndetse na moto 27 Igipolisi cy’u Burundi kivuga ko zafatiwe ahitwa Rohero, muri Komini Mukaza, muri Bujumbura, aho bivugwa ko ari Hussein Radjabu zari kuzifashishwa mu guhungabanya igikorwa cy’amatora ya referandumu ateganyijwe kuwa 17 Gicurasi 2018.Umuvugizi w’igipolisi, Pierre Nkurikiye, yavuze ko ibi binyabiziga byari bihishe mu rugo rw’uwitwa Bayussuf kuva mu 2010, ngo bikaba byaratumijwe na Hussein Radjabu, wahoze ari perezida w’ishyaka CNDD riri ku butegetsi akaza kutumvikana na perezida Nkurunziza ndetse agafungwa mbere yo gutoroka muri Werurwe 2015.
Hussein Radjabu akaba yaratorotse Gereza ya Mpimba yari afungiyemo, aho yari yakatiwe imyaka 13 y’igifungo mu 2007 nyuma yo guhamwa n’icyaha cyo gushaka guhungabanya umutekano w’igihugu.
Nk’uko umuvugizi w’igipolisi yabitangaje kuri uyu wa Kane, itariki 10 Gicurasi, ngo Hussein radjabu yatumije ibi binyabiziga ubwo yari akiri perezida w’ishyaka riri ku butegetsi, CNDD-FDD, ndetse ngo hakaba hari n’ibindi byari mu nzira byahise bijyanwa muri Sudani.
Uyu muvugizi wa polisi akaba avuga ko izi modoka na moto byari kuzifashishwa mu guhungabanya amatora ya referandumu akaba ari nayo mpamvu bazifashe kuri ubu zikaba ziparitse ahakorera Urwego rw’Igihugu rw’ubutasi (SNR) nk’uko ikinyamakuru Iwacu-Burundi dukesha iyi nkuru kivuga.
Hussein Radjabu, uvugwa muri iki kibazo akaba abarizwa mu buhungiro muri Uganda cyangwa muri Repubulika iharanira demokarasi ya Congo , yahise agira icyo avuga kuri aya makuru abinyujije kuri twitter abaza impamvu habaho guhungabanya referandumu ashimagira ko ari igikorwa cya Perezida Nkurunziza Abarundi batitayeho.
Umuvugizi w’igipolisi yaboneyeho kuburira abanyapolitiki bose, abari mu gihugu n’abari hanze yacyo, avuga ko uzagerageza guhungabanya umutekano azafatwa kandi agahanwa.
Hagati aho, uwari ubitse ibi binyabiziga ntiyatawe muri yombi kuko ngo nta cyaha ashinjwa, ariko igipolisi kikaba cyatangaje ko gikomeza iperereza.
Ngo Hussen Radjabu yari yabiguze akiyoboye , CNDD-FDD, aha umuntu akaba yakwibaza uko byaguzwe ubuyobozi bwose bwa CNDD-FDD butabizi ,naho byaciye ngo byinjizwe mu gihugu.
Yaje gutoroka Prison mu mwaka wa 2015 nyuma y’imyaka umunani afunzwe, akaba ari umuntu ubu yumvikana gake cyane anenga ibikorwa by’ubutegetsi, avuga ko bwamurenganije.
Ari mu bantu batangije kandi bakorera cyane CNDD-FDD kuva ikiri mw’ishyamba kugeza bafashe ubutegetsi mu 2005 n’inyuma yaho.
