Uwitwa Habiyambere Andree, umuyoboke w’ishyaka Amizero y’Abarundi rya Agathon Rwasa yatawe muri yombi, ashinjwa kuba inyuma igitero cyagabwe ku nkambi ya gisirikare ku wa Gatanu w’icyumweru gishize.
Habiyambere asanzwe atuye ku musozi wa Nyamitanga, Zone Ndava, Komini Buganda mu Ntara ya Cibitoke, akaba yafashwe n’igipolisi kirimo gukora iperereza ku gitero cyagabwe ku wa Gatanu tariki ya 19 Ukwakira 2018.
Amakuru atangazwa n’abo mu muryango we, bavuga ko yafashwe acyekwaho kuba mu bagabye igitero ku kigo cya gisirikare i Nyamitanga, gusa umuryango we ugashimangira ko ahorwa ibitekerezo bye bya politiki.
Utangaza ko Habiyambere ahorwa kuba ari umuyoboke w’ishyaka Amizero y’Abarundi, rya Depite Rwasa, ukaba usaba ko yarekurwa mu gihe ucyeka ko ashobora kwicwa cyangwa akagirirwa nabi mu bundi buryo.
Ku wa Gatanu tariki ya 19 Ukwakira, nibwo abantu bitwaje intwaro bagabye igitero ku kigo cya gisirikare i Nyamitanga, Komini Buganda, mu Cibitoke, bica abasirikare bane abandi batandatu barakomereka.
Uyu muyoboke w’ishyaka Amizero, atawe muri yombi mu gihe sebuja, Agathon Rwasa ashinjwa gutegura umugambi wo gushaka kwica umukuru w’igihugu, Pierre Nkurunziza n’abandi bayobozi, ibyaha binashinjwa undi mudepite witwa Ndikumana Pierre Celestin, bose barabihakana bavuga ko ari uburyo Leta y’u Burundi iyobowe na CNDD FDD, ishakamo gucecekesha abatavuga rumwe nayo.
