Minisitiri w’Intebe, Dr Ngirente Edouard, yagejeje ku Nteko Ishinga Amategeko imitwe yombi ibikorwa bya Guverinoma birebana n’Ubuhinzi n’Ubworozi.
Minisitiri w’Intebe yavuze ko mu mwaka wa 2017 ibyoherezwa mu mahanga byazamutse ku kigero cya 39% u Rwanda rwinjiza amadolari ya Amerika miliyoni zisaga 428, aho mu mwaka wa 2015 yari miliyoni zisaga 262 $.
Mu byoherejwe mu mahanga byazamutse harimo igihingwa cya kawa, icyayi, ibireti, imboga n’imbuto, indabo n’ibindi.
Agaciro ka kawa kiyongereyeho 3%, kavuye kuri 62,040,000 $ mu 2015 kagera kuri 64,115,952 $ (bihwanye na toni 18,670) mu 2017; yavuze ko agaciro k’icyayi kiyongereyeho 14%, kavuye kuri 72,862,490 $ mu 2015 kagera kuri 84,265,962 $ mu 2017.
Agaciro k’ibireti kiyongereyeho 5%, kavuye kuri 2,522,$ mu 2015 kagera kuri 2,664,607 $ mu 2017.
Agaciro k’imboga n’imbuto kiyongereyeho 65%, kavuye kuri 6,446,418 z’amadolari y’abanyamerika (bihwanye na toni 23,441) mu 2015 kagera kuri 18,526,677 z’amadolari y’abanyamerika (bihwanye na toni 30,294) mu 2017.
Ku bijynye n’indabo, mu 2017 kari 2,515,698 z’amadolari y’abanyamerika (bihwanye na toni 416) zivuye kuri toni 35 (142,747$) zo mu 2016 igihe kohereza indabo hanze byatangiraga.
Agaciro k’ibinyampeke n’amafu kiyongereyeho 77%, kavuye kuri 20,411,184 $ mu 2015 kagera kuri 87,172,160 $ mu 2017.
Agaciro k’inyama kiyongereyeho 27%, kavuye kuri 14,790,450 $ mu 2015 kagera kuri 20,193,420 $ mu 2017. Agaciro k’amatungo mazima yoherezwa mu mahanga kiyongereyeho 9%, kavuye kuri 23,720,096 $ mu 2015 kagera kuri 26,017,567 $ mu 2017.
Minisitiri w’Intebe yanavuze ko impu u Rwanda rwohereje hanze zo zagabanutseho 42% aho zari ku gaciro ka 10,352,932 $ mu 2015 zigera kuri 7,314,128 $ mu 2017.
Ibi byatewe ngo n’intambwe nziza mu gutunganya ibikomoka ku mpu u Rwanda rwateye mu myaka ibiri ishize.
Agaciro k’amata yoherezwa hanze kagabanutseho 7%, kavuye kuri 13,950,314 $ mu 2015 kagera kuri 13,060,624 $ mu 2017.
Minisitiri w’Intebe yagaragaje ko ubuhinzi n’ubworozi bufite agaciro gakomeye mu bukungu bw’igihugu, aho buri ku kigero cya 31% ku musaruro mbumbe w’igihugu.
