Mu kiganiro n’umunyamakuru Nathalie Amar wa RFI ku ngingo zinyuranye zijyanye n’inshingano Mme Louise Mushikiwabo aheruka gutorerwa zo kuyobora Umuryango mpuzamahanga w’ibihugu bikoresha Igifaransa, yabajijwe ingamba afitiye uru rurimi kugira ngo abaruvuga biyongere.
Mushikiwabo yagombaga gusubiza ibibazo 21 by’umunyamakuru bigiye bifitanye isano n’ururimi rw’Igifaransa no kuruteza imbere binyuze muri politiki z’umuryango wa OIF uyobowe na Louise Mushikiwabo, ndetse harimo n’ibivuga ku buzima yaciyemo mbere yo gutorerwa kuyobora uwo mu ryango.
Ku kibazo kirebana no kuba Mushikiwabo avuga neza indimi enye, Icyongereza, Igifaransa, Igiswahili n’Ikinyarwanda, yasubije ko benshi mu bavuga Igifaransa bisanga bagomba kumenya izindi ndimi kuko ariho isi ya none igeze. Ngo abantu bavuga indimi nyinshi kubera impamvu zo gushakisha amaramuko nko kuba babasha kumvikana n’abo bahahirana, ku mpamvu zijyanye no koroherwa no kwiga n’ibindi.
Ati “Jyewe ndi umuntu muri abo bumva bakanavuga indimi nyinshi. Nkomoka mu Rwanda, igihugu kiri muri Africa yo hagati y’abavuga Igifaransa n’iy’Iburasirazuba y’abavuga Icyongereza. Tuvuga Igiswahili, Igifaransa, Icyongereza, ndetse hari bamwe bakoresha Ilingala.”
Louise Mushikiwabo yavuze ko ari byiza ku bavuga Igifaransa kuba bataheranwa n’ururimi rumwe, bakwiye kumenya n’izindi nubwo yenda baba bakunze cyane Igifaransa.
Yabajijwe niba hakwiye kubaho intambara yo kurwanira ko Igifaransa kiganza izindi ndimi, abakivuga bakava ku bihumbi 300 yenda bakaba barenga ibihumbi 400 mu myaka ya 2050. Akaba yabajijwe icyakorwa guhera ubu muri 2019 kugira ngo Igifaransa kivugwe.
Ati “Sinkunda kumva ko habaho intambara (y’Igifaransa) gihanganye n’izindi ndimi. Gusigasira Igifaransa, oya, ahubwo kukimenyekanisha, gutuma kigaragara kigakoreshwa mu bintu binyuranye , mu bucuruzi, muri Siyansi ni ikintu gikomeye.”
Yavuze ko biri mu nshingano yatorewe kugira uruhare mu kumenyekanisha Igifaransa.
Umunyamakuru yamubajije kugira icyo avuga ku myumvire ya benshi ko Igifaransa ari ururimi rukomeye cyane.
Mushikiwabo yasubije ko iyo myumvire ihari ariko ko abantu bakwiye kuyihindura kuko ngo Igifaransa ntigikomeye cyane. Ngo hari abavuga ko Igifaransa ari ururimi rw’abize, ari ururimi rw’imitoma (ubuvanganzo) muri rusange rugoye kuvugwa.
Ati “Ni byo rwose Igifaransa gikwiye kuvugwa kandi neza, ni ko giteye, ariko muri uyu mwaka hari intego twihaye, ni ubutumwa tubwira abantu, ko bagerageza gushyiraho akabo (mu kuvuga Igifaransa), ko ubutumwa ubasha kuvuga bikoroheye mu Cyongereza, wanabuvuga mu Gifaransa.”
Abajijwe niba Internet itaba ahantu ho gukoresha ku bakiri baton go bamenyere kuvuga Igifaransa, Louise Mushikiwabo yavuze ko higwa uburyo abato bo mu Isi ivuga Igifaransa batozwa kujya kuri Internet kandi bakahahurira n’Igifaransa, bakakimenya, bakagikunda.
Kuri uyu wa kane tariki 21 – 23 Werurwe, Mme Louise Mushikiwabo arasura Congo Kinshasa akaba agirana ibiganiro na Perezida Félix Antoine Tshisekedi.
Src : Umuseke
