Ikipe ya Rayon Sports ikomeje kwitegura imikino itandukanye irimo shampiyona y’igihugu ya 2021-2022 aho igomba gukomeza ku munsi wayo wa 3, ifite umukino igomba gukina kuri uyu wa Gatatu tariki ya 17 Ugushyingo 2021 aho izakira ikipe ya AS Banda yo muri Congo Kinshasa.
Uyu mukino uteguwe mu rwego rwa gicuti ku mpande zombi by’umwihariko ku ikipe ya Rayon Sports yo mu Rwanda igiye gukina na AS Banda nyuma yaho yari yateguye gukina na AS Dauphin Noir nayo yo muri icyo gihugu cya Congo Kinshasa.
Rayon Sports yagombaga gukina na AS Dauphin, binyuze kuri twitter Gikundiro yavuze ko habayeho kubura kw’ibyangombwa by’abakinnyi yo muri icyo gihugu bibemerera gusohoka igihugu cyabo, bityo Rayon Sports ikaba yahisemo kuba yakina na AS Banda kuri uyu wa gatatu aho bidahindutse bazakinira kuri Sitade Amahoro.
Usibye kuba iyi kipe ya Rayon Sports irimo gutegura uyu mukino, kuri uyu wa mbere kandi yaraye igiranye amasezerano y’ubufatanye na kompanyi ya Tom Transfers isanzwe igurisha ndetse ikanakodesha amamodoka.
Ubu bufatanye bwasinywe hagati y’impande zombi buzibanda ku kuba ikipe ya Rayon Sports izahabwa imodoka ebyiri zo mu bwoko bwa Suzuki Swift zifite agaciro kangana na Miliyoni 15 z’Amafaranga y’u Rwanda.
Ikipe ya Rayon Sports yo izafasha iyi kompanyi kwamamaza ibikorwa byayo binyuze ku mbuga nkoranyambaga zayo nka Facebook, Twitter na Instagram.
Nk’uko aya masezerano ku mpande zombi yasinywe batangaje ko afite agaciro kangana n’igihe cy’umwaka umwe.
