Nyuma yaho imikino ibanza yari yasojwe mu guhatanira shampiyona y’ikiciro cya mbere mu bagabo mu mukino w’intoki wa Basketball, mu mpera z’iki cyumweru harakinwa imikino y’umunsi wa kabiri yo kwishyura uhereye mu itsinda rya mbere rya A ndetse n’iraya B.
Nk’uko ishyirahamwe Nyarwanda ry’umukino w’intoki wa Basketball FERWABA, ryamaze kubitangaza iyi ikino iratangira gukina kuri uyu wa gatanu mu kiciro cy’abagabo bakaba bari bukinire ku bibuga bishya byubatswe hafi ya Sitade Amahoro iherereye i Remera.
Ingengabihe ya FERWABA, iragaragaza ko mu bagabo, bo bazaba basubukura imikino yo kwishyura kuko shampiyona yahagaze bari barakinnye umunsi wa mbere w’imikino yo kwishyura (Second Leg), yabaye tariki 26-27/6/2021.
Uhereye mu itsinda rya B, imikino iratangira ku isaha ya Saa munani, Ikipe ya UR CMHS BBC irakira ikipe ya APR BBC , naho ku isaha ya saa Kumi ikipe ya 30 Plus BBC yakire ikipe ya Espoir BBC, muri iri tsinda kandi mu ntara y’amajyepfo muri IPRC Huye ku isaha ya Saa kumi n’imwe ikipe ya Rusizi BBC irakina na RP IPRC Huye BBC.
Nyuma y’iyo mikino ku isaha ya saa kumi n’ebyiri z’umugoroba, mu itsinda rya mbere rya A, ikipe ya RP IPRC Musanze BBC irakina na Shoot 4 Stars BBC ku kibuga gishya cyubatswe hafi na Sitade Amahoro.
Kugeza ubu mu itsinda rya mbere rya A, ikipe ya Patriots BBC irayoboye aho ifite amanota 16 igakurikirwa na UGB ifite amanota 12 naho ikipe ya RP IPRC Musanze ndetse na Tigers BBC zose zifite amanota 7.
Mu itsinda rya kabiri ariryo rya B, ikipe ya REG BBC ifite imanota 15, APR BBC iri ku mwanya wa kabiri n’amanota 11 mugihe ikipe ya Rusizi BBC iri ku mwanya wa karindwi n’amanota 5.
