Judi Rever, Inkoramutima ya Kayumba Nyamwasa yahagurukiye guhakana no gupfobya Jenoside yakorewe Abatutsi

Judi Rever ni umunyakinyoma kabombo  w’umunya Canada wiyemeje kuba umuzindaro w’ibitekerezo  by’ imitwe y’iterabwoba nka RNC, n’abandi babaswe n’ingengabitekerezo ya Jenoside nka FDLR.  Akaba yari n’inshuti cyane ya Patrick Karegeya nawe wafatanyije na Kayumba Nyamwasa gushinga umutwe w’iterabwoba wa RNC nyuma yo guta inshingano ze mu Rwanda.

Amateshwa asebya u Rwanda n’abayobozi barwo n’ahakana Jenoside yakorewe Abatutsi, Rudi Rever ayanyuza mu kinyamakuru”Marianne Rever” cy’aho muri Canada, kenshi ugasanga ari imvugo  isa neza neza n’iy’abicanyi, nka Théoneste BAGOSORA, Anatole NSENGIYUMVA, Ferdinand NAHIMANA, n’abandi  bahamwe n’uruhare rutaziguye muri Jenoside yakorewe Abatutsi.

Uyu  mugome Judi Rever,  wahagurukiye gupfobya Jenoside yakorewe Abatutsi, ntanatinya gushyira  ku ngabo za FPR-Inkotanyi ubwicanyi bwabereye hirya no hino mu Rwanda mu gihe cya Jenoside.Mu buswa bwinshi agashyiramo n’ubwabereye mu duce ingabo za FPR zitagenzuraga ku matariki  ahimbahimbana n’ ibigarasha n’interahamwe ngenzi ze. Ibi abikora kandi atitaye ku buhamya bwatanzwe  mu nkiko zinyuranye, zirimo  n’Urukiko Mpuzamahanga Mpanabyaha rwashyiriweho uRwanda(ICTR), aho abantu batandukanye, barimo n’abashakashatsi mpuzamahanga, bagaragaje uruhare rudashidikanywaho  rw’Interahamwe, abajandarume n’ abasirikari ba Leta y’Abatabazi(FAR) mu gutsemba Abatutsi  hirya no hino mu Rwanda.

Urugero rugaragaza urwango ruvanze n’ubuswa bwa RUDI REVER, ni aho yanditse  ko ngo ubwicanyi bwakorewe Abatutsi bo mu Bisesero  bwakozwe n’ingabo za FPR-Inkotanyi , akirengagiza ko  ubwicanyi bukorwa,  Kibuye yose na yagenzurwaga n’ingabo za Leta. Ibi bigashimangirwa n’ubuhamya bw’abasirikari b’Abafaransa bari muri operation Turquoise,  banashinjwa kuba baratereranye abari bahungiye mu Bisesero, babwiye itsinda ry’abadepite b’Ubufaransa ko ingabo za FAR zari  mu BISESERO no mu bindi bice bya Kibuye  kugeza tariki 18 Nyakanga 1994.

Si ibi gusa kuko nko mu rubanza rwa Eriezel NIYITEGEKA rwabereye Arusha muri ICTR, abatangabuhamya barimo abarokotse ubwicanyi bwabereye mu Bisesero ndetse n’ababugizemo uruhare, basobanuye neza uburyo ku matariki ya 13 na 14/05/1994, uyu Eriezel Niyitegeka  yayoboye Interahamwe na EX-FAR basaga 6000 mu bitero byishe ibihumbi n’ibihumbi  by’Abatutsi bari bahungiye mu misozi ya Bisesero. Abatutsi bari basigaye bakomeje kwirwanaho, maze tariki 18/06/1994, Edouard Karemera Alias Rukusanya, wari Minitsri w’ubutegetsi bw’Igihugu, ategeka ko mu Bisesero hakorwa”isuku”, nabwo hapfa abatabarika.

Imiryango  iharanira inyungu z’Abarokotse Jenoside yakorewe Abatutsi, nka SURVIE, igaragaza ko mu binyoma bye,  JUDI REVER yifashisha ababeshyi nka James MUNYANDINDA. Uyu muhemu  abenshi basigaye bafata nk’uwataye umutwe, muw’2017  yatanze ubuhamya yemeza ko indege ya Perezida Yuvenali HABYARIMANA  yahanuwe na FPR-Inkotanyi. Aya magambo yaje guteshwa agaciro kuko byagaragaraga ko ari aya mpemukendamuke.

Icyo abazi neza amateka y’uRwanda bakomeza kwibaza  kuri aya mahomvu ya  JUDI REVER rero, ni ukumenya  niba  ayaterwa  gusa n’urwango afitiye FPR-Inkotanyi n’abarokotse Jenoside yakorewe Abatutsi,  niba yifitiye uburwayi bwo kugoreka ukuri kugaragarira buri wese, cyangwa akaba afitemo izindi nyungu (iz’izirari ry’umubiri n’iz’amafaranga),dore ko  amakuru ava muri RNC na FDLR, avuga ko  uyu mugore witwara nk’uwigurisha  afitanye ubucuti bwihariye na Kayumba Nyamwasa n’abandi  bo mu mitwe y’iterabwoba.

Amakuru yizewe kandi, avuga ko uyu  Judi REVER afitanye isano ya hafi n’umugore witwa Nicole BERJOVIN waburaniye Paulina Nyiramasuhuko. Mu miburanire ye itaragenderaga ku itegeko na rimwe, yirirwaga atuka FPR kugeza ubwo abacamanza bari bayobowe n’Umunyatanzaniya William SEKULE bamwibukirije ko FPR atariyo iregwa muri urwo rubanza. Iyo yaburaga ingingo  ishinjura”umukiliya” we, yahitaga  asuka amarira(y’ingona), amayeri yo kuyobya abacamanza ngo batwarwe n’amarangamutima.Ntibyamuhiriye ariko kuko urubanza rwa Nyiramasuhuko rwari urucabana, biza kurangira akaniwe urumukwiye.

Twababwira kandi ko Iki kinyamakuru  MARIANNE REVER  cyakomeje gutambutsa inyandiko z’abahakana bakanapfobya Jenoside yakorewe Abatutsi, nk’Umubiligi  Philip REYNTJENS, Umufaransa André GUICHAOUA, Umunyakameruni Charles ONANA , n’abandi  nka Pierre PEAN batahwemye guhakana no gupfobya Jenoside yakorewe Abatutsi, no gushyigikira ku mugaragaro Interahamwe n’ibindi bisa  nazo.

Ubugarasha n’ubuterahamwe bwa Rudi Rever n’agatsiko ke tuzakomeza kubukurikiranira hafi no kubwamagana, kuko tutakwihangarira abagoreka amateka y’Abanyarwanda.