Mu ijoro ryo kuri iki cyumweru tariki ya 13 Werurwe 2022, muri Onomo Hotel iherereye mu mujyi wa Kigali nibwo hatanzwe ibihembo by’abahize abandi mu byiciro bitandakanye.
Ni ibihembo byateguwe na The Choice ikiganiro cy’imyidagaduro gica ku Isibo TV, mu gice cy’abakinnyi iki gikombe cyahawe Byiringiro Lague ukinira APR FC.
Muri iki kiciro cy’abakinnyi cyegukanywe na Lague Byiringiro wagitwaye atsinze abarimo rutahizamu wa AS Kigali Sugira Ernest, Yves Mutabazi ukina umukino w’intoki wa Volleyball ndetse na Gasana Keneth ukina Basketball.
Igihembo cy’umukinnyi mwiza cyahawe Byiringiro Lague w’imyaka 22 y’amavuko, ni kimwe mu bihembo byatanzwe mu byiciro 14 harimo n’igihembo cyiswe ‘Icon Award’, cyahawe umuhanzi Jay Polly uheruka kwitaba Imana.
Uyu mukinnyi ari kumwe n’ikipe y’igihugu Amavubi bageranye muri 1/4 cy’imikino y’igikombe cya Afurika y’abakinnyi bakina imbere mu gihugu kizwi nka CHAN, ni irushanwa ryaberaga mu gihugu cya Cameroon.
Byiringiro Lague kandi yatwaranye igikombe cya Shampiyona n’ikipe asanzwe akinira y’Ingabo z’Igihugu ya APR FC, icyo gihe bakaba barayitwaye badatakaje umukino n’umwe.
