Mu rwego rwo kwitegura isubukurwa rya shampiyona y’umupira w’amaguru mu Rwanda mu mwaka w’imikino wa 2020-2021, amakipe atandukanye akomeje gukina imikino ya gicuti, kuri uyu wa kane tariki ya 22 Mata 2021 ikipe ya Kiyovu SC yari yakiriye ikipe ya Polic FC naho kuri Sitade Amahoro ikipe ya APR FC yakira Rutsiro FC.
Mu mukino wabereye kuri Sitade ya Mumena i Nyamirambo, ikipe ya Kiyovu SC yari yakiriye ikipe ya Police FC maze ikipe y’urucaca ihatsindirwa ibitego 4-2, ku ruhande rwa Police FC ni ibitego byatsinzwe na Sibomana Patrick Pappy, Ndayishimiye Antoine Dominique, Twizerimana Martin Fabrice na Munyakazi Youssuf Lule mu gihe ku ruhande rwa Kiyovu yo yatsindiwe na Ngendahimana Eric ndetse na Ishimwe Kevin.
Muri uyu mukino ikipe ya Police niyo yatangiye neza by’umwihariko mu gice cya mbere kuko ubwo hari ku munota wa 37 w’umukino rutahizamu Nshuti Savio yahaye umupira mwiza Sibomana Patrick, nawe ahita awushyira mu rushundura neza, iki gitego cyakurikiwe n’icyatsinzwe ku munota wa 40 aho abakinnyi ba Police FC bavuye inyuma bahererekanya neza baha Dominique ahita atsinda igitego cya kabiri.
Mbere y’uko amakipe ajya ku ruhuka Police FC yatsinze ikindi gitego cya gatatu ubwo hari ku munota wa 43 w’umukino, ni igitego cyatsinzwe n’umukinnyi wo hagati mu kibuga Twizerimana Martin Fabrice wahoze akinira Kiyovu SC ayibonera igitego cyatandukanyije impande zombi z’igice cya mbere.
Amakipe avuye ku ruhuka, ikipe ya Kiyovu SC yari yakiriye uyu mukino niyo yatangiye neza kuko ubwo hari ku munota wa 64 w’umukino nibwo abakinnyi b’inyuma ba Police FC bakoreye ikosa kuri rutahizamu Saba Robert, iri kosa ryakorewe mu rubuga rw’amahina ryahaye Penaliti Kiyovu maze Ishimwe Kevin uheruka kwinjira muri iyi kipe avuye muri APR FC atsinda iyo penaliti neza.
Nyuma y’iminota itatu gusa batsinze icyo gitego ubwo hari ku munota wa 67, umukinnyi wo hagati mu kibuga ku ruhande rwa Kiyovu Sport Ngendahimana Eric uzwi nka Gasongo wanahoze akinira ikipe ya Police FC yatsindiye Kiyovu igitego cya kabiri ubwo hari ku mupira ahawe na Serumogo Ally.
Ikipe ya Police FC yabonye igitego cya kane cyatsinzwe na Munyakazi Youssuf uzwi nka Lule, hari ku munota wa 81 w’umukino ubwo rutahizamu Mico Justin yakorewe ikosa na myugariro Mbogo Ally mu rubuga rw’amahina, umusifuzi yemeza ko ari penaliti maze Lule ayinjiza neza bityo binarangira umukino ari ibitego 4 bya Police FC kuri 2 bya Kiyovu SC.
Mu wundi mukino wabereye kuri sitade Amahoro I Remera APR FC yari yakiriye ikipe ya Rutsiro FC, ni umukino warangiye ikipe y’ingabo z’igihugu itsinze igitego kimwe ku busa.
Muri uyu umukino umutoza wa APR FC Mohammed Adil yari wahisemo gukinisha amakipe abiri atandukanye, warangiye ikipe ya APR FC itsinze igitego kimwe ku busa ni igitego cyatsinzwe ku munota wa 32′ gitsinzwe na Ruboneka Jean Bosco wari wabanje mu kibuga kuri uyu mukino.
Usibye uyu mukino, APR FC irateganya gukina indi mikino ibiri ya gicuti mbere y’uko shampiyona itangira, aho iteganya gukina na Marines FC ku cyumweru tariki ya 25 Mata 2021 ndetse bakazakina na Mukura VS mu cyumweru gitaha.
Usibye iyi mikino yaraye ibaye, mu mpera z’iki cyumweru hateganyijwe umukino uzahuza ikipe ya Kiyovu SC izakira ikipe ya Mukura Victory Sport ndetse kandi ikipe ya Rayon Sports ikazakira ikipe ya Police FC.
