Ibirori Summer Beach Fest byo kwidagadurira ku mucanga w’ikiyaga cya Kivu bizaba kuri uyu wa Gatandatu byitezweho gusiga bisusurukije Abanyarwanda.
Sheeba Karungi
Nk’uko abategura ibi birori babitangaje, imiyiteguro ya ‘Summer Beach Fest’ bayigeze kure kandi kuri iyi nshuro bakaba bazazana aba DJ bakomeye ndetse n’umuhanzi w’icyamamare ukunzwe muri Afurika y’uburasirazuba ndetse no muri Uganda uyu akaba ari umugandekazi witwa Sheebah, aho muri uyu mwaka hongewemo n’abahanzi nyarwanda barimo itsinda rya ACTIVE na Social Mula.
Dj Africano umwe mu bafite uruhare rukomeye mu gutegura ‘Summer Beach Fest’ yashimangiye ko hazagaragara impinduka zidasanzwe by’umwihariko imitegurire, ibyuma bizakoreshwa ndetse n’amasaha yo kwidagadura yongerewe kuko hari benshi babyifuzaga.
Summer Beach Fest ni ibirori ngarukamwaka bibera ku mucanga wo ku Kivu aho urubyiruko rutandukanye rwishimishiriza ku mazi ari nako basunikirwa imiziki myiza n’abahanga mu kuyivanga.
umuhanzi utegerejwe cyane ukomoka muri Uganda ubu ukunzwe cyane mu karere
Ibi birori muri uyu mwaka biteganyijwe ku wa Gatandatu tariki 2 Nyakanga 2016 kuri Kivu Serena Hotel aho kwinjira bizaba ari amafaranga y’u Rwanda 10,000.
Iki gitaramo kandi kizasusurutswa nabavangavanga umuziki (Djs) banyuranye bo mu Rwanda barimo Dj Africano, Dj Mackeda, Dj Pyfo ndetse n’umushyushya rugamba Phil Peter.
