Impuzamashyirahamwe y’Umukino wa Volleyball muri Afurika (CAVB) yashimiye Perezida wa Repubulika y’u Rwanda, Paul Kagame, ku ruhare yagize mu migendekere myiza ya Shampiyona Nyafurika y’Amakipe y’Abagabo yabereye i Kigali muri uyu mwaka.
Ubu butumwa bwatanzwe ubwo CAVB yateranaga muri kongere yayo yabereye ku kirwa cya Sal muri Cap-Vert, tariki ya 3 n’iya 4 Ukwakira 2026, aho Ishyirahamwe ry’Umukino wa Volleyball mu Rwanda (FRVB) ryahawe igihembo cy’indashyikirwa kubera imikorere myiza ndetse n’uruhare ryagize mu iterambere rya Volleyball muri Afurika.
Mu gutanga iki gihembo, CAVB yashimye by’umwihariko uruhare rwa Perezida Paul Kagame mu gutuma Shampiyona Nyafurika y’Amakipe y’Abagabo, CAVB Men’s Club Championship 2026, igenda neza ubwo yabereye i Kigali kuva ku wa 20 Mata kugeza ku wa 3 Gicurasi 2026.
Perezida Kagame kandi yagaragaye mu bikorwa by’iri rushanwa, aho ku wa 22 Mata 2026 yakurikiranye umukino wo gufungura warangiye APR VC yo mu Rwanda itsinze Black Rhinos yo muri Zimbabwe amaseti 3-0.
Iri rushanwa ryitabiriwe n’amakipe 24, arimo ane yari ahagarariye u Rwanda. By’umwihariko, Police VC yanditse amateka yo kuba ikipe ya mbere y’u Rwanda igeze ku mukino wa nyuma w’iri rushanwa, ndetse ikegukana umudali wa Feza nyuma yo gutsindwa na Al Ahly yo mu Misiri amaseti 3-0.
REG VC na yo yegukanye umudali w’Umuringa, nyuma yo gutsinda Petrojet Sporting Club yo mu Misiri amaseti 3-1. Uyu wabaye umudali wa mbere REG VC ibonye mu mateka yayo muri iri rushanwa.
Ku ruhande rwa CAVB, ishimwe ryahawe Perezida Kagame ryaje mu gihe u Rwanda rukomeje kongera umwanya warwo mu kwakira amarushanwa akomeye ya Volleyball muri Afurika.
Mu rwego rwo gushimira ibikorwa by’ishyirahamwe ry’uyu mukino n’uruhare rwayo mu iterambere rya Volleyball, CAVB yahaye FRVB igihembo cy’indashyikirwa, cyakiriwe na Perezida waryo, Raphaël Ngarambe, mu izina ry’u Rwanda.
Ibihembo n’ishimwe byatanzwe na CAVB bigaragaza ko uruhare rw’u Rwanda mu iterambere no kwakira ibikorwa bikomeye bya Volleyball muri Afurika rukomeje kwitabwaho ku rwego rw’umugabane.
