Kuri uyu wa Gatatu, tariki ya 16 Ukwakira 2024 nibwo amakipe ya Polisi y’u Rwanda yerekanye abakinnyi izakoresha mu mwaka w’imikino wa 2024-2025.
Ni umuhango wabereye ku cyicaro cya Polisi y’u Rwanda ku Kacyiru, muri uyu muhango witabiriwe na DCG JC UJENEZA(Deputy Inspector General of Police in charge of Administration & Personnel) na CSP Jackline URUJENI, umuyobozi w’amakipe ya Volleyball.
Hari kandi abatoza, abakinnyi b’amakipe yombi azitabira shampiyona y’u Rwanda izatangira kuri uyu wa Gatanu tariki ya 18 Ukwakira 2024.
Mu kwitegura uyu mwaka, ikipe ya Police Volleyball Club y’Abagabo yongeyemo abakinnyi batatu.
Aba bagizwe na Manzi Saduru wavuye muri APR VC, Jahara Koita (Outside Hitter) wakinaga mu ikipe ya OMK VC yo muri Algeria na Ishimwe Patrick (Receiver attacker) wasoje amashuri yisumbuye ari mu beza mu ikipe ya GS Officiel de Butare.
Mu ikipe y’Abagore hongerewemo Umunya-Ghana kazi AYEPOE Sandra Azuremah (Middle Blocker) wakinaga El Walk Wings y’iwabo muri Ghana
Herekanywe kandi umutoza ushinzwe kongerera abakinnyi imbara mu ikipe y’Abagore ariwe Murangwa Usenga Sandrine n’ushinzwe itangazamakuru mumakipe yombi, IMANI Isaac Rabbin.
Police VC y’Abagabo isanzwe itozwa na Musoni Fred iritegura gukina umukino wa mbere kuri uyu wa Gatanu aho izakina na REG VC, ni umukino uzabera muri Petit Stade guhera Saa moya z’ijoro.
Police VC y’Abagore itozwa na Hatumimana Christian izatangira ikina n’ikipe ya East Africa University Rwanda WVC, ni umukino uzakinwa kuwa Gatandatu guhera saa saba z’amanywa ukazabera muri Petit Stade.
