Mujyanama Claude uzwi nka Tmc ku izina ry’ubuhanzi ni umwe mu bagize itsinda rya Dream Boyz ahuriyemo na Platini, uyu muhanzi wari warashoje amashuri ye ya kaminuza icyiciro cya kabiri, ubu yatangiye kongeraho ikindi cyiciro cya gatatu cya kaminuza (Master’s).
TMC yari yararangije amasomo ye ya Kaminuza mu cyahoze ari Ishuri ry’Ubumenyi n’Ikoranabuhanga rya Kigali (KIST), ubu ni muri Kaminuza y’u Rwanda mu ishami ry’Ubumenyi n’ikoranabuhanga. TMC yarangije kaminuza mu bijyanye n’ubugenge (Physics). Mu kiganiro yahaye Inyarwanda.com yaduhamirije amakuru yuko yasubiye ku ishuri.
TMC yabwiye Inyarwanda.com dukesha iyi nkuru ati “Ubu ndi kwiga natangiye amasomo y’icyiciro cya gatatu cya kaminuza (Master’s), nibyo mpugiyemo muri iyi minsi.” Uyu muhanzi ari kwiga mu ishuri rya Jomo Kenyatta aho ari kwiga ishami rya ‘Project Management’, TMC aganira na Inyarwanda.com yatubwiye ko nta mpungenge atewe no kuvanga umuziki n’ishuri kuko byose bisaba ubushake ndetse no kwiha gahunda ngenderwaho bityo agahamya ko byanze bikunze azabifatanya bigashoboka.
TMC yiyemeje gusubira ku ishuri
