Umushinjacyaha Mukuru w’u Rwanda, Mutangana Jean Bosco, yatangaje ko biteguye gukora iperereza ku magambo ya Faustin Twagiramungu uba mu buhungiro mu Bubiligi, ashobora kuba agize ibyaha byo gupfobya Jenoside. Bityo akaba yatabwa muri yombi.
Inshuro nyinshi Twagiramungu yagaragaye ku mbuga nkoranyambaga yandika amagambo avuga ko Jenoside yakorewe Abatutsi itateguwe, ko mu Rwanda habaye Jenoside ebyiri n’ibindi.
Abantu batandukanye bakunze gusaba ko amagambo y’uyu mugabo yakorwaho iperereza ku buryo abiryozwa.
Umushakashatsi ku mateka, Tom Ndahiro, abinjujije ku rukuta rwe rwa Twitter, yasabye Urwego rw’Igihugu rw’Ubugenzacyaha gukora iperereza kuri Twagiramungu kuko ibitekerezo bye biganisha ku cyaha.
Yakomeje agira ati “Urwango afitiye abarokotse Jenoside n’ababarokoye, ruteye ikibazo”.
Umunyamabanga wa Leta muri Minisiteri y’Ububanyi n’Amahanga, Olivier Nduhungirehe, yavuze ko bibabaje kubona Twagiramungu wabaye Minisitiri w’Intebe w’u Rwanda agiriwe icyizere na FPR, yarahindutse umuhakanyi wa Jenoside.
Ibi Nduhungirehe yabitangaje nyuma y’ubutumwa bwa Twagiramungu buvuga ko Jenoside mu Rwanda yakozwe na FPR [mu gihe bizwi neza ko ariyo yayihagaritse] hamwe n’Ingabo zari iza FAR.
Umushinjacyaha Mukuru, Jean Bosco Mutangana, yabwiye Itangazamakuru ko amagambo ya Twagiramungu ashobora kuganisha ku cyaha cyo gupfobya cyangwa guhakana Jenoside yakorewe Abatutsi.
Ati “Aho avuga ko itigeze itegurwa, akavuga ko Habyarimana na MRND batigeze bategura Jenoside, ibyo bihabanye cyane n’ibyemejwe n’inkiko mpuzamahanga n’ibikorwa bigaragara byerekana ko Jenoside yateguwe, Interahamwe zikigishwa, ingengabitekerezo yayo ikigishwa mu mashuri, kugeza aho abatutsi bishwe mu myaka myinshi kugeza no mu 1994.”
Yakomeje avuga ko Twagiramungu adashobora kwihisha inyuma y’ibyo yita ubwisanzure mu gutanga ibitekerezo ngo avuge ibyo ashaka.
Ati “Ntabwo ubushinjacyaha buzihanganira izo mvugo. Turabikorera isesengura, ibyo tuzasanga bifite ibyaha bifatika bishobora gutuma akurikiranwa tuzabikora rwose. Tuzakorana n’ibyo bihugu aherereyemo cyane cyane ko dusanzwe dufitanye n’imikoranire.”
“Twiteguye gukora iperereza kuri we, tugakorana n’igihugu arimo […] Niba agiye kuba uhakana Jenoside, azajya ku rutonde rw’abagomba gukurikiranwa nk’abapfobya Jenoside.”
Umushinjacyaha Mukuru yakomeje avuga ko ari inshingano z’Ubushinjacyaha gukurikirana umuntu wese uri mu murongo w’abapfobya, bagahakana Jenoside ‘kimwe n’abandi bashaka no kuba bayikora nka FDRL’.
Itegeko ryo mu 2013 rishyiraho icyaha cy’ingengabitekerezo ya Jenoside n’ibindi byaha bifitanye isano nayo, rivuga ko guhakana Jenoside bishingiye ku magambo agoreka ukuri kuri Jenoside hagamijwe kuyobya rubanda no kwerekana ko Jenoside yakorewe Abatutsi itateguwe.
Rikomeza rivuga ko gupfobya bigizwe n’amagambo agabanya uburemere cyangwa ingaruka za Jenoside yakorewe Abatutsi no koroshya uburyo Jenoside yakozwemo.
Twagiramungu yabaye Minisitiri w’Intebe w’u Rwanda kuva mu 1994 yegura mu 1995, ahita yerekeza mu buhungiro mu Bubiligi.
Mu 2003 yiyamamarije umwanya w’Umukuru w’Igihugu nk’umukandida wigenga gusa aza gutsindwa aho yagize amajwi 3.62% mu gihe Perezida Paul Kagame yagize 95.0 %.
![Intambara y’amagambo irarimbanije muri Rwanda National Congress [RNC] zombi](https://rushyashya.net/wp-content/uploads/2016/08/arton6779-360x240.jpg "Intambara y’amagambo irarimbanije muri Rwanda National Congress [RNC] zombi")
Mulind
Kwandika ibintu bitaribyo ukabihamiriza ni bibi cyane.
umuntu uvuga ko inkiko mpuzamahanga zemeje ko jenoside yateguwe yabikuye he? Niba nibeshya mumbabarire. Urukiko mpanabyaha mpuzamahanga rwashyiriweho U Rwanda rwemeje ko jenoside yateguwe? Kugeza none nzi ko itateguwe. Uzi ko yateguwe, ambwire urubanza babivuzemo.
Naho kuvuga ngo nta jenoside yabaye nyuma y’aho FPR ifatiye ubutegetsi, basome ibyo Rapport mapping ivuga. Hari aho bavuga ko amarorerwa yabaye muri Congo Kinshasa, igihe abahutu barenga ibihumbi 400 byicwaga na FPR,ashobora kuzitwa jenoside yakorewe abahutu nihajyaho urukiko ruzacira abo bose imanza. Icyakora , bitinde , urwo rukiko rujyaho.
Naho ibyo uwo mushinjacyaha avuga afatanije na Tom Ndahiro ni amagambo kandi igihe kimwe bazabibasubizamo.
Karinganire
Njye kubwanyu ndumva abanyarwanda dukeneye kumenya ukuri , ntabushake bugaragara bwo gushaka kumenya ipfundo ry’ikibazo , ubwo rero sinzi amaherezo
Ephrem
Wowe wiyise Mulind. Niba utazi gusoma uzasubire mu ishuri. Ushake imyanzuro y’urubanza rwa Kambanda uzabona ko genocide yakorewe abatutsi yateguwe. Naho ibyo bitakatagasi bya raporo ya Maping utuzanira hano ntacyo bidufasha kuko tuzi abayikoze abo aribo ninayo mpamvu kugeza kuri iyi tariki yataye agaciro kandi ntanaho yigeze ikoreshwa. Isigaranye wowe nabo muhuje ibitekerezo bibi bisenya igihugu.