U Rwanda rwageze muri kimwe cya kane cy’imikino Nyafurika ya Volleyball, ni nyuma yo gutsinda ikipe ya Burikina Faso amaseti atatu ku busa

Ku mugoroba wo kuri uyu wa Kane, ikipe y’igihugu y’umukino w’intoki wa Volleyball mu mikino Nyafurika ikomeje kubera hano mu Rwanda mu bagabo, ikipe y’igihug y’u Rwanda yisanze mu makipe atandatu amaze kubona itike ya kimwe cya kane nyuma yo gutsinda Burkina Faso amaseti atatu ku busa.

Uyu mukino wo itsinda rya mbere wagiye kuba ikipe ihagarariye u Rwanda isabwa gutsinda uyu mukino kugirango yizere gusanga andi makipe muri kimwe cya kane cy’isangiza, ibi u Rwanda rwaje kubigeraho nyuma yo gutsinda Burkina Faso amaseti 3-0 (25-14, 25-20, 25-16).

Muri uyu mukino umikinnyi w’umunyarwanda Mutabazi Yves niwe watowe nk’umukinnyi mwiza witwaye neza muri uyu mukino kuko mu manota 75 agize amaseti 3-0 u Rwanda rwatsinze Burkina Faso, Mutabazi Yves yatsinzemo amanota 20 wenyine.

Kugeza ubu amakipe atandatu amaze kubona itike yo gukina imikino ya kimwe cya kane ni Rwanda na Uganda yo mu itsinda A, Tunisia yo mu itsinda B, Cameroon na Repubulika Iharanira Demokarasi ya Congo yo mu itsinda C ndetse n’ikipe y’igihugu ya Morocco .

Ikipe y’igihugu y’u Rwanda irasubira mu kibuga kuri uyu wa gatanu ku isaha ya saa kumi n’ebyiri z’umugoroba aho iribuhure n’ikipe y’igihugu ya Uganda harebwa ikipe izazamuka muri iri tsinda ari iya mbere dore ko zombi zanabonye itike yo gukomeza mu kindi cyiciro.