Nyuma yaho ku wa 11 Ukuboza 2017, Uganda na Tanzania, batangiriye ndetse bata muri yombi itsinda ry’ urubyiruko rw’ impunzi z’abanyarwanda zari zerekeje mu myitozo y’umutwe urwanya ubutegetsi bw’u Rwanda, RNC, mu Burasirazuba bwa Repubulika Iharanira Demokarasi ya Congo, ababyeyi baratabaza .
Uru urubyiruko rugera kuri 45 rwatawe muri yombi rwabaga mu nkambi y’ impunzi ya Nyakivale rwigishijwe amatwara ya RNC rujyanywa kwitoza gisirikare mu misozi miremirere ya Minembwe mu gace Itombwe mu Burasirazuba bwa Congo-Kinshasa, bamwe baza gufatwa.
RNC yizezaga ababyeyi ko abana bagiye koherezwa muri Irak
Uku gutabaza kubaye mu gihe ushinzwe ubukangurambaga muri RNC, Kayumba Rugema wakomeje uvugwaho ibi bikorwa ahora yumvisha ababyeyi bafite abana mu nkambi ya Nyakivale ko abana babo bagiye gutozwa kugirango boherezwa muri Irak mu mirimo y’ umutekano nk’ uko bisanzwe bifasha urubyiruko rwinshi rudafite akazi muri Uganda.
N’ ubwo Rugema Kayumba yizezaga ababyeyi ko abana babo bagiye kubona amahirwe yo kujya gukorera amafaranga menshi muri Irak si uko byagenze kuko benshi muri bo baje gutabwa muri yombi na polisi ya Uganda ku mupaka wa Uganda na Tanzania mu gace ka Kikagati ubwo bageragezaga kwambuka kugirango binjire muri Tanzania banyure i Burundi maze bambuke mu Majyepfo ya Kivu aho i Minembwe aho bitoreza.
Ni muri uru rwego ababyeyi bafite abana bajyanywe muri RNC bagafatwa n’ inzego z’ umutekano bandikiye ibaruwa ifunguye ambasade ya Norvege muri Uganda bayisaba ko abana babo baherutse gufatwa barekurwa nk’ uko tubikesha Site de la diaspora Rwandaise.
Rugema wa RNC afite ubuhungiro muri Norvege
Kuba uyu Rugema Kayumba ufitanye isano na Gen. Kayumba Nyamwasa washinze RNC yaje gukorera muri Uganda aturutse muri Norvege igihugu cyamuhaye ubuhungiro nibyo bituma aba babyeyi basaba iki gihugu kugira uruhare mu kuvuganira abana babo kugirango barekurwe mu maguru mashya.
Gusa kuva na mbere hose Rugema Kayumba aza gukorera muri Uganda yahoze ari umuhuzabikorwa wa RNC aho muri Norevege.
Amakuru agera kuri Bwiza.com yemeza kandi ko Rugema Kayumba yaje gukorera muri Uganda ku butumire bwa nyirarumwe we Gen.Kayumba Nyamwasa ubarizwa muri Afurika y’ Epfo.
Mu bikorwa ashinzwe by’ ubukangurambaga no kwinjiza urubyiruko rw’ abanyarwanda muri RNC, Rugema Kayumba afatanyije na bamwe mu bayobozi bakuru b’ urwego rukuru rw’ iperereza rya gisirikare cya Uganda(CMI).
