UGANDA: Abakobwa Batonganye n’ Abayobozi b’ Ishuri Kubera Kwambara Imyenda Igaragaza ubwambure bwabo

Kampala – Nyuma y’uko ifoto y’umwe mu banyeshuli biga muri kaminuza ya Makerere ikwirakwiye kuri murandasi abayobozi batumije igitaraganya nyirubwite ngo asobanure ibyayo ibintu bitabonwa kimwe n’abanyeshuli bagenzi be.

Nadumba Rebecca umunyeshuli ugaragara yitabiriye ibirori yambaye ikanzu igaragaza bimwe mu bice bye by’ibanga yatumijwe n’akanama gashinzwe imyitwarire y’abanyeshuli muri Kaminuza ya Makerere.

Uku guhamagazwa kwe n’abayobozi ntibyakiriwe neza na bamwe mu banyeshuli biga muri ino kaminuza.

Uyu mukobwa ashijwa nabagize akanama k’imyitwarire muri iyi kaminuza kwica nkana amategeko agenga abanyeshuli bityo ngo agomba kwisobanura imbere y’aka kanama akibona itangazo iyi kaminuza yasohoye.

Nubwo ubuyobozi bubibona gutya gusa abanyeshuli bagenzi be bavuga ko iyi kaminuza yagahanganye n’ibindi bibazo by’ingutu aho kwita kuri ibi bidafite umumanaro kuri bo.

Bamwe mu banyeshuli banenga bikomeye iyi kaminuza kucyemezo yafashe cyo gutumiza Rebecca mu nama ngo yisobanure; nk’uwitwa Kalema Ken Josel yavuze ko uyu mukobwa ari umuntu mukuru ibyo yakoze yari yabitekerejeho ndetse si umwana wo kuyoborwa uko yakitwaye.

Undi witwa Constantine Wandera yavuze ko iyi kaminuza yagakemuye ibibazo bikomeye aho guta umwanya ku kabazo toto.

Kugeza nyirubwite ntacyo aratangaza mu gihe agitegerejwe n’inama ishinzwe imyitwarire ya kaminuza.