Umusirikare wa Uganda arimo guhigwa bukware nyuma yo kwiba umukozi wa mobile money 400,000 by’Amashilingi mu mujyi wa Bombo. Uyu Corporal Tom Bingi asanzwe abarizwa mu kigo cya gisirikare cya Bombo mu Karere ka Luweeo.
Lt Col Deo Akiiki, umuvugizi wungirije wa UPDF, yasobanuye ko Bingi yatorotse mu ijoro ryo kuwa Kane nyuma yo gutunga imbunda umukozi wa mobile money witwa Hamza Jaffar akamutwara amafaranga yose yari afite. Akiiki yongeyeho ko uyu musirikare yanarashe amasasu menshi mu kirere akanga abaturage mbere yo gucikana ayo mafaranga. Yongeyeho ko kumushakisha byatangiye.
Osman Kassim Ramathan, umuyobozi muri Bombo yavuze ko abaturage bagerageje gukurikirana uwo musirikare bakamugeza ku gasantere ka Ndejje ariko ntibabashe kumufata kuko yari afite imbunda nk’uko iyi nkuru dukesha The Observer ikomeza ivuga.
Biravugwa kandi ko UPDF irimo gushakisha undi musirikare waburanye imbunda mu kwezi gushize atorotse iki kigo cya gisirikare cya Bombo. Mu 2013 Pvt Patrick Okot Odoch nawe wabaga muri iki kigo yacikanye imbunda anarasa abantu 10 barimo bagenzi be abarasiye mu kabari.
Uyu okoth Odoch yaje gutabwa muri yombi akatirwa igifungo cy’imyaka 90 nyuma yo guhamwa n’icyaha cy’ubwicanyi no kugerageza kwica. Muri uwo mwaka kandi ngo undi musirikare witwa Pvt Simon Peter Otenyan yarashe bagenzi be babiri.
