Igipolisi cyo mu Karere ka Kanungu mu gihugu cya Uganda cyatangiye iperereza ku rupfu rw’umunyururu wapfiriye muri gereza bikekwa ko yishwe n’uburozi.
Nyakwigendera ni uwitwa Enos Maniriho w’imyaka 21 wakomokaga ahitwa Kyabuyorwa ya Ruguru, mu Mujyi wa Butogota wo mu Karere ka Kanungu.
Umuvugizi w’igipolisi muri Kigezi, Elly Maate, yavuze ko uyu munyururu wapfuye yari yafatanywe n’abandi bantu 9 kuwa 20 Mutarama 2017 bashinjwa gushimuta abantu barangiza bakaka ingurane.
Yavuze ko bose uko ari icyenda bakekwagaho gukorana n’abantu bari muri Repubulika iharanira Demokarasi ya Congo mu gushimuta abantu bakaka ingurane y’amafaranga imiryango yabo nk’uko iyi nkuru dukesha Chimpreports ivuga.
Umuvugizi w’igipolisi yakomeje avuga ko nyakwigendera yafashwe n’uburwayi bitunguranye ari muri gereza ya Kanungu agapfa ari kujyanwa ku Kigo Nderabuzima cya Kanungu ya IV kuwa 20 Gashyantare 2017.
Yongeyeho ko imihango yo kumushyingura yakozwe ndetse ibice bimwe by’umubiri bigashyirwa umuvuzi wa leta muri Kampala ngo iperereza rikomeze. Yavuze kandi ko urupfu rw’iyi mfungwa rubabaje kuko yapfiriye muri gereza aho baba bizeye umutekano, yongeraho ko nyuma y’iperereza ababikoze bazagezwa imbere y’urukiko bagasubiza ibyaha bazashinjwa.
Elly Maate
