Mu gitondo cyo kuri uyu wa gatatu tariki ya 17 Ugushyingo 2021 nibwo hagiye hanze ibaruwa y’uwari umunyamabanga w’ikipe ya Bugesera FC Sam Karenzi yanditse amenyesha ubuyobozi bw’iyo kipe ko yeguye ku mirimo yo kuba umunyamabanga w’iyi kipe isanzwe ibarizwa mu karere ka Bugesera mu ntara y’i Burasirazuba.
Nk’uko bigaragara muri iyo baruwa yanditswe tariki ya 15 Ugushyingo 2021 yandikiwe perezida w’ikipe ya Bugesera FC, Sam Karenzi yanditse avuga ko asezeye kuri izo nshingano ku bw’impamvu ze bwite.
Muri iyi baruwa kandi, Sam Karenzi akomeza avuga ko kandi azakomeza gufasha iyi kipe mu buryo bwose bushoboka kubera ko asanzwe ari umukunzi wayo.
Sam Karenzi asezeye kuri uyu mwanya wo kuba umunyamabanga wa Bugesera nyuma yaho iyi kipe irimo kwitegura gusubura shampiyona igiye gukinwa ku munsi wayo wa gatatu aho Bugesera FC yitegura gukina n’ikipe ya Espoir FC.
Sam Karenzi yabaye umunyamabanga wa Bugesera FC guhera mu mwaka wa 2018, kuri ubu akaba asanzwe ari umuyobizi wa Radio ya Fine FM ndetse akaba anakora mu kiganiro cy’imikino gitambuka kuri iyo Radio kitwa “Urukiko rw’ubujurire”.
