Nyuma y’amezi ane atoza Rayon Sports, Ivan Minnaert yeguye ku mirimo ye kuko abayobozi be batubahirije ibyo bamusezeranyije.
Ivan Minnaert hamwe na Masudi juma
Minnaert yatangaje ubwegure bwe nyuma yo gutsinda Kiyovu Sports ibitego 2-0.
Mu kiganiro n’abanyamakuru yagize ati “Neguye ku mpamvu zitari iz’amikoro, ni izindi ziri hanze y’imikino.”
Umutoza wa Rayon Sports yirinze kuvuga impamvu zitumye yegura amaze gutsinda imikino ibiri ya Gicumbi na Kiyovu Sports n’uwo yanganyije na AS Muhanga.
Yagize ati “Mu mpera z’icyumweru gishize nibwo nagejeje ku buyobozi ubwegure bwanjye, nashimira abakinnyi uko bitanze n’abayobozi bakora cyane ngo ikipe itere imbere.”
Ivan Minnaert avuga ko bimwe mu byo ubuyobozi bwamusezeranyaga batabikoraga yemera gutegura no gutoza uyu mukino nk’umutoza w’umwuga.
Minnaert yashimiye abafana bamubaye hafi avuga ko yifuza kuzagaruka mu Rwanda mu ikipe ifite abakunzi nka Rayon Sports.
Muri uyu mwaka w’imikino Rayon Sports yayobowe n’abatoza Habimana Sosthene akomeza yungirije David Donadei na we wasimbuwe na Ivan Minnaert kuva muri Nzeli 2015.
Ivan Minnaert yavuze ko hari amakipe menshi amushaka mu gihe Rayon Sports ayisigiye Masudi Juma wari umwungirije ugomba gutegura umukino wa Espoir kuri stade ya Kigali tariki ya 2 Werurwe 2016.
M.Fils
