Nyuma yaho umukinnyi wa Manchester United Jesse Lingard ukina afasha ba rutahizamu atijwe mu ikipe ya West Ham United zose zo mu Bwongereza ashobora kugaruka muri United mu mpeshyi z’uyu mwaka yongererwa amasezerano amugumisha i Old Trafford.
Ibi bibaye nyuma yaho uyu mukinnyi wagiye agorwa no kubona umwanya ubanzamo muri Manchester United muri iyi imyaka ibiri iheruka bitewe nuko ku mwanya we Man U yahazanye abakinnyi bamurusha birangira atijwe muri West Ham United muri Mutarama 2021.
Nyuma yo kugera muri iyi ikipe kwa Jesse Lingard yahagiriye ibihe byiza kuko mu mikino irindwi amaze gukinira iyi kipe yatsinzemo ibitego bitanu ndetse anatanga imipira ibiri yabyaye ibitego, bitewe no kwitwara neza muri iyo kipe byatumye ikipe ye ya Manchester United itekereza kuzamugarura mu mpeshyi z’uyu mwaka wa 2021 ndetse ikaba yanamuha andi masezerano mashya.
Jesse Ellis Lingard w’imyaka 28 y’amavuko arimo kugana ku musozo w’amasezerano ye muri Manchester United kuko azarangira tariki ya 31 Kamena 2021 bityo ikipe ya United ikaba yifuza ko yamugumana mu yindi myaka iri imbere.
Uyu mukinnyi wakuriye mu ikipe ya Manchester United, kuri ubu ari kumwe n’ikipe ye y’igihugu y’u Bwongereza aho irimo guhatanira itike y’ikikombe cy’isi cya 2022 kizabera muri Qatar.
