Ikipe ya Sunrise FC yo mu karere ka Nyagatare yamaze gutandukana n’abakinnyi bayo batandatu barimo abari basoje amasezerano ndetse harimo n’abandi bari bagifitanye nayo ay’umwaka umwe.
Ibi bibaye nyuma yaho iyi kipe yasoje mu makipe abiri ya nyuma mu mwaka w’imikino wa 2020-2021 mu kiciro cya mbere mu mupira w’amaguru, ibi bikaba byaratumye yo na AS Muhanga zijya mu kiciro cya kabiri nubwo kugeza ubu hataramenyekana niba aya makipe yombi azajya muri icyo kiciro cyangwa izaguma mu cyambere.
Amakuru ava mu karere ka Nyagatare ndetse na RUSHYASHYA NEWS yamenye, ni uko abakinnyi batandukanye nayo ari umunyezamu Itangishaka Jean Paul, Kawesa, Ayubu Ibrahim ndetse na Souleyman Majanjaro bose bakomoka mu gihugu cya Uganda, aha kandi hiyongeraho Ngabo Hercules na Ndayishimiye Celestin.
Iyi kipe ikaba itandukanye n’aba bakinnyi mu gihe n’abandi bakinnyi batatu bamaze kwerekeza mu ikipe ya Bugesera FC, abo bakinnyi ni Ayubu Ibrahim, Muhinda Bryan ndetse n’umunyezamu Nsabimana Jean De Dieu uzwi nka Chaolini.
