Mu mukino wa shampiyona w’umunsi wa 12 mu kiciro cya mbere wahuje ikipe ya Kiyovu SC yari yakiriye ikipe y’ingabo z’igihugu ya APR FC, warangiye amakipe yombi anganyije ubusa ku busa mu mukino wabereye kuri Sitade ya Kigali.
Muri uyu mukino warangiye amakipe yombi anganyije, ikipe ya APR FC yabonyemo ikarita itukura yahawe Ruboneka Bosco usanzwe akina mu kibuga hagati afatanya na Mugisha Bonheur.
Kiyovu SC yakinnye uyu mukino idafite abakinnyi bayo babiri ba rutahizamu bakomoka mu gihugu cya Uganda bayobowe na Emmanuel Arnold Okwi utaragera mu Rwanda nyuma y’akaruhuko yari yahawe k’iminsi mikuru ndetse na Mzamiru Mutyba wageze mu Rwanda ariko we akaba atarakoreshejwe kuri uyu mukino.
Kunganya kw’amakipe yombi byatumye ikipe ya Kiyovu SC ikomeza kuyobora uru rutonde rwa shampiyona rw’agateganyo, aho kugeza ubu mu mikino 12 imaze gukinwa ifite amanota 25 igakurikirwa na APR FC ifite 24 ariko ikaba ikizigamye indi mikino 2 itari yakina.
Shampiyona y’u Rwanda ku munsi wayo wa 12 irasozwa kuri uyu wa mbere aho ikipe ya Mukura VS iri bwakire ikipe ya Police FC kuri sitade ya Huye naho Gasogi United yakire ikipe ya Gicumbi FC, ni umukino ubera kuri Sitade ya Kigali yose igakinwa guhera ku isaha ya Saa cyenda.
Mu mukino Mukura VS yakira Police FC ubera mu ntara y’amajyepfo, ugiye kuba mu gihe Mukura imaze imikino ine idatsinda Police FC kuko muri iyo mikino bamaze guhura banganyije incuro 2 batsindwa kabiri.
Mukura VS igiye gukina yishimira ko mu yagaruye umutoza wayo mukuru Ruremesha Emmanuel wari wahagaritswe mu mikino ibiri iheruka.
Ni mugihe Police FC nayo yagaruye umutoza mukuru Frank Nuttal wari umaze iminsi atari mu Rwanda kuko yari yaragiye muri Ecosse mu biruhuko ari naho akomoka, gusa ariko iyi kipe irakina idafite Hakizima Muhadjiri wahagaritswe kubera amakarita atatu y’umuhondo yujuje bituma asiba umukino umwe.
