Ku munsi wo kuri uyu wa mbere tariki ya 23 Gicurasi 2022, mu mikino itandukanye hano mu Rwanda habaye ibikorwa bitandukanye mu mikino myinshi aho bamwe mu bakunzi b’amakipe amwe n’amwe ndetse n’abakunzi bayo baraye bameze neza bitewe no kwitwara neza kw’amakipe yabo.
Duhereye mu mupira w’Amaguru, mu gihugu cy’u Bufaransa haberaga irushanwa ry’abakinnyi bakiri bato babarizwa mu marerero atandukanye y’ikipe ya Paris St Germain yo hirya no hino ku isi mu bakinnyi bari munsi y’imyaka 15.
Ku ruhande rw’u Rwanda, ikipe yari ihagarariye igihugu mu bari munsi y’imyaka 13 mu bahungu batwaye igikombe cy’Isi itsinze ikipe ya Brazil kuri penaliti nyuma yaho amakipe yombi yaari yanganyije mu minota 90 yari iteganyijwe.
Usibye kuba u Rwanda rwaratahukanye intsinzi mu bari munsi ya 13, abandi bari munsi y’imyaka 11 mu bahungu nabo bari bakinye umukino wo guhatanira umwanya wa gatatu, batsinzwe na USA West mu guhatanira umwanya wa gatatu bivuze ko batahanye umwanya wa kane.
Ku cyumweru, tariki ya 22 Gicurasi 2022, nibwo ikipe y’igihugu y’u Rwanda y’abari n’abategarugori yatangiye umwiherero yitegura imikino ya CECAFA Senior Women’s Championship 2022, iteganyijwe kubera muri Uganda guhera tariki ya 01 Kamena 2022.
Mu gitondo cyo kuri uyu wa mbere Ikipe y’igihugu y’abagore yakoze imyitozo ya mbere, yitegura CECAFA y’ibihugu izabera muri Uganda.
Kuri uyu wa mbere kandi nibwo hasojwe imikino y’umunsi wa 28 wa shampiyona y’u Rwanda mu bagabo, mu mikino yabaye yarangiye APR FC isubiranye umwanya wa mbere nyuma yo gutsinda ikipe ya Gorilla FC ibitego 2-1, ni mugihe Kiyovu Sports yo yanganyije na Etoile de l’Est 1-1 bityo isigaraho inyuma amanota 2.
Uko imikino y’umunsi wa 28 yose yagenze:
APR FC 2-1 Gorilla FC
Kiyovu Sports 1-1 Etoile De L’Est
MUKURA VS 1-0 Gicumbi FC
Rayon Sports 3-1 Etincelles
Rutsiro FC 2-3 Police FC
Gasogi United 2-1 Musanze FC
AS Kigali 0-0 Bugesera FC
Espoir FC 1-1 Marines FC
Ku rundi ruhande kandi, mu mukino w’intoki wa Basketball umukinnyi w’u Rwanda Wilson Gasana Kenneth yaraye ahwe ubwenegihugu bw’ubunyarwanda nyuma y’imyaka isaga 13 ageze mu gihugu, kuri ubu asanzwe abarizwa mu ikipe ya Bahrain Sports Club.
